پاکستان ریلوے کی 2 مسافر ٹرینیں مختلف حادثات کا شکار

عوام ایکسپریس کی 3 اور جعفر ایکسپریس کی 6 بوگیاں پٹری سے اترگئیں

ساجد علی اتوار 10 اگست 2025 10:57

رحیم یار خان/ کوئٹہ ( اُردو پوائنٹ اخبارتازہ ترین۔ 10 اگست 2025ء ) پاکستان ریلوے کی 2 مسافر ٹرینیں مختلف حادثات کا شکار ہوگئیں۔ تفصیلات کے مطابق ایک حادثہ رحیم یار خان کے قریب ہوا جہاں عوام ایکسپریس حدثے کا شکار ہوئی جس کی وجہ سے عوام ایکسپریس کی 3 بوگیاں پٹری سے اترگئیں، حادثے کا شکار بوگیوں کو ٹرین سے الگ کر دیا گیا۔ ریلوے حکام کا کہنا ہے کہ ٹرین پشاور سے کراچی جا رہی تھی کہ اس دوران خان پور سٹی پھاٹک پر حادثے کا شکار ہوئی، حادثے کی وجہ فوری طور پر معلوم نہیں ہوسکی، حادثے میں کوئی جانی نقصان نہیں ہوا تاہم ڈاؤن ٹریک پر ٹرینوں کی آمد و رفت معطل ہوچکی ہے، ٹریک کو جلد بحال کر دیا جائے گا۔

بتایا گیا ہے کہ دوسرا حادثہ بلوچستان میں مستونگ کے قریب سپزنڈ کے مقام پر ہوا جہاں ریلوے ٹریک پر دھماکہ ہوا، اس دھماکے کے وقت کوئٹہ سے پشاور جانے والی جعفر ایکسپریس وہاں سے گزر رہی تھی جو اس دھماکے میں حادثے کا شکار ہوگئی، جس کے باعث ٹرین کی 6 بوگیاں پٹری سے اتر گئیں تاہم خوش قسمتی سے حادثے میں کوئی جانی نقصان نہیں ہوا۔

(جاری ہے)

دو روز قبل بھی بلوچستان کے علاقہ سبی میں ریلوے ٹریک پر دھماکہ ہوا تھا جس میں جعفر ایکسپریس حادثے سے بال بال بچ گئی تھی، سبی میں ریلوے ٹریک پر دھماکہ کوئٹہ سے پشاور جانے والی جعفر ایکسپریس کے گزر جانے کے بعد ہوا، جس کے باعث ٹرین کسی بھی قسم کے حادثے سے محفوظ رہی اور دھماکے سے کوئی نقصان نہیں ہوا، جب کہ بلوچستان سے تعلق رکھنے والی کالعدم شدت پسند تنظیم بی ایل اے نے اس دھماکے کی ذمہ داری قبول کی تھی۔

چند روز پہلے 4 اگست کو بھی کوئٹہ سے پشاور کے روٹ پر چلنے والی مسافر ٹرین جعفر ایکسپریس پر اس وقت ایک اور حملے کی کوشش کی گئی جب پیر کی صبح کولپور کے قریب ریلوے ٹریک کی کلیئرنس کے لیے بھیجے گئے پائلٹ انجن پر فائرنگ کی گئی جس کے نتیجے میں ٹرین کو دوزان ریلوے سٹیشن پر ہی روک دیا گیا، اس واقعے میں کوئی جانی نقصان نہیں ہوا تھا، بعد ازاں ٹریک کلیئر ہونے کے بعد ٹرین روانہ کی گئی۔

ریلوے انتظامیہ کا کہنا تھا کہ جعفر ایکسپریس سے قبل ایک پائلٹ انجن کوئٹہ سے سبی تک ٹریک کی جانچ کے لیے چلایا جاتا ہے تاکہ کسی ممکنہ تخریب کاری سے بچا جا سکے، اسی سلسلے میں پیر کی صبح دوزان کے قریب واقع ٹنل نمبر 16 کے قریب اس پائلٹ انجن پر فائرنگ کی گئی اس دوران انجن کو پانچ گولیاں لگیں تاہم انجن کا ڈرائیور اور دیگر عملہ محفوظ رہا، فائرنگ کے بعد انجن کو بحفاظت دوزان سٹیشن پہنچا دیا گیا اور واقعے کی تحقیقات شروع کردی گئیں۔