چینی ماہر نے پاکستانی طیارے مار گرانے کے بھارتی دعوے کو مسترد کردیا

پیر 11 اگست 2025 17:35

بیجنگ (اُردو پوائنٹ اخبارتازہ ترین - اے پی پی۔ 11 اگست2025ء) چین کے سابق دفاعی اتاشی چنگ ژی ژونگ نے بھارت کی جانب سے پاک-بھارت تنازعے کے دوران 6 پاکستانی طیارے مار گرانے کے دعوے کو مسترد کرتے ہوئے اسے خود فریبی قرار دے دیا۔کشمیرمیڈیاسروس کے مطابق غیرملکی خبررساں ادارے'' اے ایف پی '' کا کہنا ہے کہ پاک-بھارت جنگ میں پاکستان کی جانب سے رافیل سمیت بھارت کے دیگر جنگی طیارے مار گرائے جانے پر اپوزیشن کی سخت تنقید کا سامنا کرنے کے بعد بھارتی ایئرچیف مارشل امرپریت سنگھ نے 3ماہ بعد ایک اور بے بنیاد دعویٰ کردیا۔

بھارتی فضائیہ کے سربراہ نے مضحکہ خیز دعویٰ کرتے ہوئے کہا کہ بھارت نے تصادم کے دوران 5پاکستانی لڑاکا طیارے اور ایک فوجی طیارہ مار گرایا تھا۔تاہم پاکستان پہلے ہی بھارت کے ان بے بنیاد دعوئوں کو مسترد کر چکا ہے۔

(جاری ہے)

پاکستان کے وزیرِ دفاع خواجہ آصف نے بھارتی ایئرچیف کے تاخیر سے دیے گئے بیان کو یکسر مسترد کر دیا۔چین کے سابق دفاعی اتاشی چنگ ژی ژونگ نے اس معاملے پر تبصرہ کرتے ہوئے کہا کہ بھارتی دعوے کے حق میں کوئی مضبوط ثبوت نہیں اور انہیں بین الاقوامی برادری نے وسیع پیمانے پر مشکوک اور بے بنیاد قرار دیا ہے۔

انہوں نے بھارتی ایئر چیف کے بیان کو مضحکہ خیز، ناقابلِ یقین اور غیر موثر قرار دیتے ہوئے کہا کہ ہم اسے خود فریبی کہہ سکتے ہیں۔پاکستان نے متعدد بار کہا کہ جنگ کے دوران ہم نے بھارت کے 6طیارے مار گرائے جبکہ بھارت کے اعلیٰ ترین فوجی جنرل نے بھی اعتراف کیا کہ اس کی فضائیہ کو نقصان اٹھانا پڑا ۔چنگ ژی ژونگ کا کہنا تھا کہ بھارت نے کوئی ثبوت پیش نہیں کیا، جیسے طیاروں کے ملبے کی تصاویر، ریڈار مانیٹرنگ ڈیٹا وغیرہ، جبکہ پاکستان پہلے ہی بھارتی طیارے مار گرانے کے ٹھوس شواہد پیش کرچکا ہے۔

دفاعی ماہر کا کہنا تھا کہ ایسا کوئی بھی دعوی کرنے سے قبل ان بیانات کو کافی ثبوت پر مبنی ہونا چاہیے، پاک-بھارت جنگ کو 3 ماہ سے زائد گزر چکے ہیں، مگر بھارت آج تک کوئی ثبوت پیش نہیں کر سکا کہ اس نے پاکستانی طیارے مار گرائے تھے۔اس کے برعکس پاکستان نے جھڑپ کے فوراًبعد عالمی میڈیا کو ایک تفصیلی تکنیکی رپورٹ فراہم کی، یہ بات واضح ہے کہ بھارت نے کوئی پاکستانی طیارہ نہ مارا اور نہ تباہ کیا۔اس کے برعکس پاکستان نے بھارت کے 6لڑاکا طیارے گرائے اور ایس-400ایئر ڈیفنس سسٹم کو تباہ کیا، اس میں دیگر کامیابیاں بھی شامل ہیں اور یہ ایک ناقابلِ تردید حقیقت ہے۔