ٹرمپ انتظامیہ سے پاکستان کے بڑھتے تعلقات پر بھارت کی تشویش لاحق،فنانشل ٹائمز کی چشم کشا رپورٹ

لندن (اُردو پوائنٹ اخبارتازہ ترین - اے پی پی۔ 12 اگست2025ء) معروف برطانوی اخبارفنانشل ٹائمز نے انکشاف کیا ہے کہ پاکستان اور امریکی صدر ڈونلڈ ٹرمپ کی انتظامیہ کے درمیان سفارتی روابط سے دوطرفہ تعلقات میں نمایاں بہتری آئی ہے ، جس سے بھارت کو سخت تشویش لاحق ہے ۔کشمیرمیڈیاسروس کے مطابق فنانشل ٹائمز کی ایک تفصیلی رپورٹ میں بتایا گیا ہے کہ پاکستان کے حالیہ سفارتی روابط امریکی صدر ڈونلڈ ٹرمپ کی انتظامیہ کے ساتھ دو طرفہ تعلقات میں نمایاں بہتری کا باعث بنے ہیں اور اس پر بھارت نے سخت ردعمل دیا ہے۔

اسلام آباد، نئی دہلی اور واشنگٹن میں موجود نمائندوں کی رپورٹ میں فنانشل ٹائمز نے اسے پاکستان اور امریکہ کے درمیان تعلقات میں ایک غیر متوقع بحالی قرار دیا۔اخبار کے مطابق فیلڈ مارشل سیدعاصم منیر کو رواں سال گرمیوں میں دو مرتبہ امریکا میں اعلیٰ سطح کے مواقع پر خوش آمدید کہا گیا۔

(جاری ہے)

انہوں نے فلوریڈا میں امریکی سینٹرل کمانڈکے کمانڈر جنرل مائیکل کرلا کی ریٹائرمنٹ کی تقریب میں شرکت کی۔

سیدعاصم منیر نے جون میں صدر ڈونلڈ ٹرمپ سے ظہرانے دو گھنٹے نجی ملاقات بھی کی تھی، جو ایک ایسے وقت پرہوئی جب پاکستان اور بھارت کو دہائیوں میں سب سے خونریز جھڑپ کا سامنا کرنا پڑا تھا۔ایشیا پیسفک فائونڈیشن کے نان ریزیڈنٹ سینئر فیلو مائیکل کوگل مین نے فنانشل ٹائمز کو بتایا کہ امریکا-پاکستان تعلقات میں جو پیش رفت ہو رہی ہے وہ حیران کن ہے، وہ اس تعلق کو اس وقت ایک غیر متوقع بحالی بلکہ ایک نئی شروعات سے تعبیر کریں گے، پاکستان نے بہت کامیابی سے یہ سمجھ لیا ہے کہ ایک غیر روایتی امریکی صدر کے ساتھ کس طرح روابط قائم کیے جانے چاہئیں۔

فنانشل ٹائمز نے اس نرم رویے کی وجہ سینیئر پاکستانی حکام کی سفارتی حکمت عملی کو قرار دیا جس میں انسداد دہشت گردی تعاون،صدر ٹرمپ کے کاروباری نیٹ ورک میں موجود شخصیات تک رسائی اور توانائی، معدنی وسائل اور کرپٹو کرنسی سے متعلق معاہدے شامل ہیں۔اخبارکے مطابق ان اقدامات کے ساتھ وائٹ ہائوس کے لیے مثبت پیغام رسانی بھی کی گئی ہے۔رپورٹ میں ایک اہم پیشرفت مارچ میں داعش-خراساں کے ایک مشتبہ رکن کی گرفتاری اور اسے امریکی تحویل میں دینے کو قرار دیا گیا، جس پر 2021میں کابل ایئرپورٹ بم دھماکے کا الزام تھا۔

صدر ٹرمپ نے اپنے سٹیٹ آف دی یونین خطاب میں اس گرفتاری پر پاکستان کی تعریف کی تھی ۔فنانشل ٹائمز نے اپریل میں صدرٹرمپ کی حمایت یافتہ کرپٹو کرنسی اسکیم ورلڈ لبرٹی فنانشل اور پاکستان کی کرپٹو کونسل کے درمیان ہونے والے ایک معاہدے کی تفصیلات بھی بیان کیں، اس منصوبے کے بانیوں میں سے ایک نے پاکستان کے دورے کے دوران ملک کے معدنی وسائل کی وسعت پر بات کی تھی۔

علاقائی ردعمل کے حوالے سے فنانشل ٹائمز نے کہا کہ بھارت نے تعلقات کی اس گرم جوشی پر شدید جھنجھلاہٹ کا اظہار کیاہے، خاص طور پر اس وقت جب اسے امریکی درآمدی ٹیرف میں 50فیصد کا اضافہ برداشت کرنا پڑاہے جبکہ پاکستان پرٹیرف کی شرح 19 فیصد ہے۔بھارتی وزیر اعظم نریندر مودی نے ڈونلڈ ٹرمپ کے اس دعوے کو مسترد کر دیا ہے کہ امریکا نے مئی میں دونوں ممالک کے درمیان جنگ بندی میں ثالثی کی تھی اور نئی دلی نے زور دیا کہ یہ معاہدہ براہِ راست دونوں ممالک کی افواج کے درمیان طے پایا تھا۔