پاکستان کو عظیم ملک بنانے کیلئے نوجوانوں اور خواتین پر سرمایہ کاری کرنا ہوگی، معاشی طور پر مضبوط ملک بن کر ہی ہم اصل آزادی حاصل کر سکتے ہیں، عاطف اکرام شیخ

اسلام آباد (اُردو پوائنٹ اخبارتازہ ترین - اے پی پی۔ 12 اگست2025ء) صدر ایف پی سی سی آئی عاطف اکرام شیخ نے کہا ہے کہ پرامن اور جمہوری جدوجہد کے ذریعے پاکستان کا قیام تاریخ کا ایک بے مثل اور بے نظیر باب ہے، معرکہ حق کے بعد اب ہمیں معاشی میدان میں بھی اپنی صلاحیتوں کا لوہا منوانا ہے، پاکستان کو عظیم ملک بنانے کیلئے نوجوانوں اور خواتین پر سرمایہ کاری کرنا ہوگی، معاشی طور پر ایک مضبوط ملک بن کر ہی ہم اصل آزادی حاصل کر سکتے ہیں۔

ان خیالات کا اظہار انہوں نے منگل کو ایف پی سی سی آئی میں یوم آزادی اور معرکہ حق کے حوالے سے منعقدہ پروقار تقریب سے خطاب کرتے ہوئے کیا۔ تقریب میں سابق چیئرمین این ڈی ایم اے لیفٹیننٹ جنرل (ر) عمر محمود حیات، ڈی سی راولپنڈی و دیگر نے شرکت کی۔

(جاری ہے)

تقریب سے خطاب کرتے ہوئے صدر ایف پی سی سی آئی عاطف اکرام شیخ نے کہا کہ یوم آزادی ہمیں اپنے آباو اجداد کی عظیم قربانیوں کی یاد دلاتا ہے، پرامن اور جمہوری جدوجہد کے ذریعے پاکستان کا قیام تاریخ کا ایک بے مثل اور بے نظیر باب ہے، پاکستان کیلئے ان گنت قربانیاں دینے والے تحریک ِپاکستان کے رہنماوں، کارکنان اور اپنے آباو اجداد کو خراج ِعقیدت پیش کرتے ہیں۔

انہوں نے کہا کہ آپریشن’’ بنیان مرصوص ‘‘اور معرکہ حق میں تاریخی فتح نے اس مرتبہ آزادی کی خوشیوں کو دوبالا کر دیا ہے ، بھارت کے ساتھ جنگ نے پوری قوم کو متحد کردیا ہے ،آپریشن’’ بنیان مرصوص ‘‘اور معرکہ حق نے ملکی دفاع کو بہت تقویت عطا کی ہے ۔ انہوں نے کہا کہ ایف پی سی سی آئی سمیت ملک بھر کی بزنس کمیونٹی افواج پاکستان کی عظیم قربانیوں کی معترف ہے۔

انہوں نے کہا کہ وزیراعظم اور فیلڈ مارشل کی قیادت میں موثر سفارتکاری کے نتیجے میں بھارتی جھوٹا اوربے بنیاد بیانیہ زمین بوس ہوا، پاکستانی قوم کی تاریخ قربانیوں اور مشکلات میں جینے سے عبارت ہے،معرکہ حق کے بعد اب ہمیں معاشی میدان میں بھی اپنی صلاحیتوں کا لوہا منوانا ہے۔ عاطف اکرام شیخ نے کہا کہ پاکستان کو عظیم ملک بنانے کیلئے نوجوانوں اور خواتین پر سرمایہ کاری کرنا ہوگی۔

انہوں نے کہا کہ جشن آزادی پر ہمیں سات دہائیوں سے آزادی اور حق ِخود ارادیت کیلئے جدوجہد کرنے والے اپنے کشمیری اور فلسطینی بھائیوں کو بھی یاد رکھنا چاہئے، آج ہم مقبوضہ جموں و کشمیر اور فلسطینی عوام کے جائز حقوق کیلئے اپنی مکمل حمایت کا اعادہ کرتے ہیں۔ عاطف اکرام شیخ نے کہا کہ اگر پاکستان ہے تو ہم ہیں ،پاکستان ہماری شناخت ہے اور اسکے ساتھ ہمارے دل دھڑکتے ہیں، آج کے دن ہم عہد کرتے ہیں کہ بہتر فیصلے کرکے ملک کومعاشی ترقی کی راہ پر گامزن کریں گے، معاشی طور پر ایک مضبوط ملک بن کر ہی ہم اصل آزادی حاصل کر سکتے ہیں۔

اس موقع پر سابق چیئرمین جوائنٹ چیفس آف سٹاف کمیٹی جنرل (ر) زبیر محمود حیات نے خطاب کرتے ہوئے کہا کہ آپریشن سندور اور معرکہ حق کی اصل جڑیں دو قومی نظریے سے منسلک ہیں، نریندر مودی نے بھارت میں مسلمانوں اور اقلیتوں پر زمین تنگ کر دی ہے، نریندر مودی، امیت شاہ اور جے شنکر انتہا پسند اور اکھنڈ بھارت کا خواب پورا کرنا چاہتے ہیں، پہلگام واقعہ سے قبل بھی بھارت نے 6 مرتبہ فالس فلیگ آپریشن کئے ، بھارت کبھی پاکستان کو استحکام اور ترقی کرتا نہیں دیکھ سکتا۔ انہوں نے کہا کہ معرکہ حق کے بعد مقبوضہ کشمیر کا مسئلہ عالمی سطح پر دوبارہ اجاگر ہوا،4 دن کی جنگ نے بھارت کی خطے میں بالادستی کا خواب چکنا چور کر دیا۔