پاکستان اور امریکہ کا دہشت گردی کی تمام اقسام اور تمام اشکال سے نمٹنے کے لیے مشترکہ عزم کا اعادہ

اسلام آباد (اُردو پوائنٹ اخبارتازہ ترین - اے پی پی۔ 12 اگست2025ء) پاکستان اور امریکہ نے دہشت گردی کی تمام اقسام اور تمام اشکال سے نمٹنے کیلئے اپنے مشترکہ عزم کا اعادہ کیا ہے۔ ترجمان دفتر خارجہ کی جانب سے منگل کو جاری پاکستان۔امریکہ انسدادِ دہشت گردی مکالمہ کے مشترکہ اعلامیہ کے مطابق دونوں ممالک نے 12 اگست 2025 کو اسلام آباد میں پاکستان۔

امریکہ انسدادِ دہشت گردی مکالمے کے تازہ دور کا انعقاد کیا، جس میں دہشتگردی کی تمام اقسام اور تمام اشکال سے نمٹنے کے لیے اپنے مشترکہ عزم کو اعادہ کیا ہے۔ یہ مکالمہ اقوام متحدہ کے لیے خصوصی سیکریٹری نبیل منیر اور امریکی محکمہ خارجہ کے قائم مقام کوآرڈینیٹر برائے انسدادِ دہشت گردی گریگوری ڈی۔ لو جرفو کی مشترکہ صدارت میں منعقد ہوا۔

(جاری ہے)

دونوں وفود نے دہشت گردی کے خطرات سے نمٹنے کے مؤثر طریقے اپنانے کی اہمیت پر زور دیا، جن میں بلوچ لبریشن آرمی، داعش خراسان اور تحریکِ طالبان پاکستان جیسے گروہوں سے لاحق خطرات شامل ہیں۔ امریکہ نے ان دہشت گرد عناصر پر قابو پانے میں پاکستان کی مسلسل کامیابیوں کو سراہا، جو خطے اور دنیا کے امن و سلامتی کے لیے خطرہ ہیں۔ مزید برآں، امریکہ نے پاکستان میں دہشت گرد حملوں میں جاں بحق ہونے والے شہریوں اور قانون نافذ کرنے والے اداروں کے اہلکاروں کے نقصان پر تعزیت کا اظہار کیا، جن میں جعفر ایکسپریس پر بربریت آمیز حملہ اور خضدار میں اسکول بس پر بم دھماکہ شامل ہیں۔

دونوں وفود نے سیکیورٹی چیلنجز سے نمٹنے اور دہشت گردی کے مقاصد کے لیے ابھرتی ہوئی ٹیکنالوجیز کے استعمال کی روک تھام کے لیے ادارہ جاتی ڈھانچوں کو مضبوط بنانے اور صلاحیتوں کو فروغ دینے کی اہمیت پر زور دیا۔ دونوں فریقین نے اس بات کی بھی توثیق کی کہ انسدادِ دہشت گردی کے موثر اور دیرپا طریقے فروغ دینے کے لیے اقوام متحدہ سمیت کثیر الجہتی فورمز پر قریبی تعاون جاری رکھا جائے گا۔ پاکستان اور امریکہ کے درمیان دیرینہ شراکت داری کو دہراتے ہوئے، دونوں فریقین نے اس بات پر زور دیا کہ دہشت گردی کے خاتمے اور امن و استحکام کے فروغ کے لیے مسلسل اور منظم روابط برقرار رکھنا نہایت اہم ہے۔