14 اگست کا دن اس عظیم جدوجہد اور بے مثال قربانیوں کا آئینہ دار ہے جو برصغیر کے مسلمانوں نے پاکستان کے قیام کے لئے دیں، سید یوسف رضا گیلانی

اسلام آباد (اُردو پوائنٹ اخبارتازہ ترین - اے پی پی۔ 13 اگست2025ء) چیئرمین سینیٹ سید یوسف رضا گیلانی نے کہا ہے کہ 14 اگست کا دن نہ صرف آزادی کی قیمتی نعمت کی یاد دلاتا ہے بلکہ اس عظیم جدوجہد اور بے مثال قربانیوں کا بھی آئینہ دار ہے جو برصغیر کے مسلمانوں نے پاکستان کے قیام کے لئے دیں۔سینیٹ سیکرٹریٹ کے مطابق قوم کو یومِ آزادی کی مبارکباد دیتے ہوئے اپنے خصوصی پیغام میں انہوں نے کہا کہ ہمارے بزرگوں اور قائدین نے گھربار، جائیدادیں اور جانیں قربان کر کے ایک آزاد اور خودمختار مملکت کا قیام ممکن بنایا جہاں ہم اپنے دین، ثقافت اور روایات کے مطابق زندگی گزار سکیں، یہ قربانیاں آنے والی نسلوں کے لئے ہمیشہ مشعلِ راہ رہیں گی اور اس بات کا ثبوت ہیں کہ ایک پرعزم اور متحد قوم ہر منزل حاصل کر سکتی ہے۔

(جاری ہے)

چیئرمین سینیٹ نے کہا کہ پاکستان کا قیام علامہ محمد اقبال کے خواب کی تعبیر اور قائداعظم محمد علی جناح کی جرأتمند قیادت کا ثمر تھا، 14 اگست 1947ء کو پاکستان دنیا کے نقشے پر ایک آزاد اور خودمختار ملک کی حیثیت سے ابھرا، آزادی ایک بے بہا نعمت ہے اور اس کی حفاظت، بقا ءاور استحکام ہر پاکستانی کا مشترکہ فرض ہے۔انہوں نے تمام پارلیمنٹیرینز پر زور دیا کہ وہ سیاسی وابستگیوں سے بالاتر ہو کر ملک کی ترقی، خوشحالی اور استحکام کے لئے خلوصِ نیت سے اپنا کردار ادا کریں۔

اس موقع پر انہوں نے مسلح افواج، سکیورٹی اداروں اور قانون نافذ کرنے والے اہلکاروں کو خراجِ تحسین پیش کیا جو اپنی جانوں کی پرواہ کئے بغیر ملک کی آزادی اور خودمختاری کے محافظ ہیں۔چیئرمین سینیٹ نے اپنے پیغام میں کشمیری اور فلسطینی عوام کو بھی یاد کیا جو ظلم و جبر کے خلاف اپنی جدوجہد جاری رکھے ہوئے ہیں اور یقین دلایا کہ پاکستان ان کی اخلاقی، سفارتی اور سیاسی حمایت اس وقت تک جاری رکھے گا جب تک وہ اپنی منزل حاصل نہیں کر لیتے۔

انہوں نے پاکستان پیپلز پارٹی کی جدوجہد اور خدمات کا ذکر کرتے ہوئے کہا کہ شہید ذوالفقار علی بھٹو نے ایٹمی پروگرام کی بنیاد رکھ کر ملک کے دفاع کو ناقابلِ تسخیر بنایا، شہید محترمہ بینظیر بھٹو نے جمہوریت اور انتہاپسندی کے خلاف جان قربان کی، صدر آصف علی زرداری نے 18ویں آئینی ترمیم کے ذریعے صوبوں کو خودمختاری دی اور آج بلاول بھٹو زرداری بطور ایک نوجوان، باصلاحیت رہنما پاکستان کی ترقی اور مثبت شناخت کے لئے سرگرم عمل ہیں۔

سید یوسف رضا گیلانی نے کہا کہ پاکستان کا ایوانِ بالا وفاق کی علامت ہے اور مضبوط، شفاف اور مؤثر پارلیمانی نظام کو قومی وحدت، استحکام اور ترقی کی ضمانت سمجھتا ہے۔انہوں نے کہا کہ قومی ہم آہنگی، بین الصوبائی اتحاد، سیاسی استحکام اور اجتماعی عمل کے بغیر ترقی کا سفر ممکن نہیں،نوجوان پاکستان کا سب سے بڑا سرمایہ ہیں اور ان کی تعلیم، مہارت اور کردار سازی میں سرمایہ کاری ہی پائیدار خوشحالی کا یقینی راستہ ہے۔چیئرمین سینیٹ نے قوم پر زور دیا کہ اس یومِ آزادی پر ہم سب یہ عہد کریں کہ مل کر ایک پُرامن، خوشحال، جمہوری اور مضبوط پاکستان کے قیام کے لئے کام کریں گے، ایسا پاکستان جو شہداء کے خوابوں، بانیانِ وطن کے نظریات اور عظیم رہنماؤں کی امنگوں کا حقیقی عکس ہو۔