فیلڈ مارشل سید عاصم منیر، چیئرمین جوائنٹ چیفس آف اسٹاف کمیٹی جنرل ساحر شمشاد مرزا،پاک بحریہ اور پاک فضائیہ کے سربراہان اور مسلح افواج کی یوم آزادی کے موقع پر قوم کو دلی مبارکباد

جمعرات 14 اگست 2025 18:40

راولپنڈی (اُردو پوائنٹ اخبارتازہ ترین - اے پی پی۔ 14 اگست2025ء) چیف آف آرمی سٹاف فیلڈ مارشل سید عاصم منیر، چیئرمین جوائنٹ چیفس آف اسٹاف کمیٹی جنرل ساحر شمشاد مرزا،پاک بحریہ کے سربراہ ایڈمرل نوید اشرف، پاک فضائیہ کے سربراہ ائیر چیف مارشل ظہیر احمد بابر سدھو اور پاکستان کی مسلح افواج کی جانب سے پاکستان کے 78 ویں یوم آزادی کے پرمسرت موقع پر قوم کو دلی مبارکباد پیش کی گئی ہے جو کہ اتحاد، عزم اور ایک روشن مستقبل کے لیے ایک غیر متزلزل عزم کی فتح کی علامت ہے۔

یوم آزادی کے موقع پر آئی ایس پی آر سے جاری بیان میں کہا گیا ہے کہ ہم بانیان پاکستان کو خراج عقیدت پیش کرتے ہیں، ہم قائداعظم محمد علی جناح کی بصیرت انگیز قیادت میں ان کے ناقابل تسخیر جذ بہ ، عزم اور بے مثال قربانیوں کو خراج تحسین پیش کرتے ہیں۔

(جاری ہے)

ان کی ہمت، دور اندیشی اور آزادی کے مقصد پرغیر متزلزل یقین، رہنمائی کا روشن مینار ہے۔

مسلح افواج ان بصیرت افروز قائدین اور جوانوں کو زبردست خراج تحسین پیش کرتی ہیں جنہوں نے ہماری قوم کی بنیاد رکھی، ان کی میراث کو گہری عقیدت اور شکرگزاری کے ساتھ آگے بڑھایا۔ قومی سلامتی کے محافظوں کے طور پر ہم پاکستان کی خودمختاری اور علاقائی سالمیت کے تحفظ، آئین کی بالادستی اور ان اقدار کے تحفظ کے لیے اپنے غیر متزلزل عزم کا اعادہ کرتے ہیں جو ہمارے قومی تشخص کا تعین کرتی ہیں۔

بیان میں کہاگیا ہے کہ مسلح افواج اور عوام کے درمیان اٹوٹ رشتہ ہماری اجتماعی طاقت کا سرچشمہ ہے۔ اس یوم آزادی کے موقع پر آئیے ہم ایک پرعزم، خوشحال اور ترقی پسند پاکستان کے خواب کو شرمندہ تعبیر کرنے کے لیے ایمان، اتحاد اور تنظیم کے نظریات کو برقرار رکھتے ہوئے امن، ترقی اور اتحاد کے لیے جدوجہد کرنے کے اپنے عزم کی تجدید کریں۔

Facebook Twitter Google + Share on Whatsapp

متعلقہ عنوان :

مزید قومی خبریں