جموں وکشمیر اور دنیا بھر میں مقیم کشمیریوں نے بھارت کے یوم آزادی کو ’’یوم سیاہ‘‘ کے طور پر منایا

جمعہ 15 اگست 2025 17:32

مظفرآباد (اُردو پوائنٹ اخبارتازہ ترین - اے پی پی۔ 15 اگست2025ء) جموں وکشمیر اور دنیا بھر میں مقیم کشمیریوں نے بھارت کے یوم آزادی کو ''یوم سیاہ'' کے طور پر منایا۔ جموں وکشمیر لبریشن سیل اور پاسبان حریت کے زیر اہتمام دارالحکومت مظفرآباد میں برہان مظفر وانی شہید چوک سے گھڑی پن چوک تک احتجاجی ریلی نکالی گئی، احتجاجی ریلی کی قیادت وزیر پی ڈی او چوہدری رشید نے کی۔

اس موقع پر خطاب کرتے ہوئے وزیر حکومت چوہدری رشید نے کہا کہ ہندوستان نے کشمیریوں کا حق آزادی اورحق خودارادیت سلب کر رکھا ہے اس کو یوم آزادی منانے کا کوئی حق نہیں، دس لاکھ سے زائد ہندوستانی قابض افواج نے مقبوضہ کشمیر کو جیل میں بدل دیا ہے۔کشمیریوں کی جان، مال، عزت اور آبرو محفوظ نہیں۔ انہوں نے کہا کہ افواج پاکستان نے معرکہ حق میں ہندوستان کے غرور اور تکبر کو خاک میں ملایا۔

(جاری ہے)

آج دنیا ایک بار پھر تنازعہ کشمیر کے حل کو خطہ کے امن کیلئے ضروری سمجھ رہی ہے۔ وزیر پاور ڈویلپمنٹ چوہدری رشید نے کہا کہ جموں وکشمیر اور دنیا بھر میں مقیم کشمیری ہندوستان کے جابرانہ قبضے کے خلاف ہندوستان کے یوم جمہوریہ کے موقع پر یوم سیاہ منا رہے ہیں، کشمیریوں نے ہندوستان کے قبضے سے پہلے ہی پاکستان کے ساتھ الحاق کرتے ہوئے پیغام دے دیا تھا ہم پاکستان کے ساتھ الحاق چاہتے ہیں ،میں کشمیریوں کو مبارکباد دیتا ہوں کہ وہ بھارت کے تمام تر مظالم کے باوجود حق خود ارادیت سے دستبردار نہیں ہوئے، حکومت پاکستان کی کامیاب سفارتکاری پرخراج تحسین پیش کرتے ہیں، انہوں نے کہا کہ 14 اگست کو کشمیریوں نے یوم آزادی پاکستان منا کر دنیاکو یہ واضح پیغام دیا ہے کہ ہماری اصل منزل پاکستان ہے۔

ریلی سے ڈائریکٹر جموں و کشمیر لبریشن سیل و آزاد جموں و کشمیر کلچرل اکیڈمی ڈاکٹر راجہ محمد سجاد خان، پاسبان حریت کے چئیرمین عزیر احمد غزالی، آل پارٹیز حریت کانفرنس کے ممبر شیخ عبدالمتین، پیپلز پارٹی کے رہنما شوکت جاوید میر، عثمان علی ہاشم اور دیگر مقررین نے خطاب کیا۔ ریلی کا آغاز سنٹرل پریس کلب مظفرآباد سے ہوا جو گھڑی پن چوک پر اختتام پذیر ہوئی۔ شرکا ریلی نے سیاہ پرچم تھامے ہوئے تھے اور بینرز اٹھا رکھے تھے جن پر بھارت کے جبری قبضے کے خلاف اور آزادی کے حق میں عبارات درج تھیں۔اس موقع پر شرکاء نے کشمیر کی آزادی کے حق میں اور بھارتی مظالم کے خلاف فلک شگاف نعرے لگائے۔