رضا کارخدمت گاربلاشبہ فوری امداد پہنچانے میں اہم کردار ادا کرتے ہیں، وزیر اعظم

اسلام آباد (اُردو پوائنٹ اخبارتازہ ترین - این این آئی۔ 18 اگست2025ء)وزیراعظم محمد شہباز شریف نے کہا ہے کہ رضاکار خدمت گار بلاشبہ حادثات، قدرتی آفات اور دیگر ایمرجنسی حالات میں اپنے نواحی علاقوں میں فوری امداد پہنچانے میں اہم کردار ادا کرتے ہیں ، ہم اپنی آنے والی نسلوں کو انسانیت پرور اور اپنی روشن معاشرتی اساس سے وابستہ تربیت دیں گے۔

انسانیت کے عالمی دن کے موقع پر اپنے پیغام میں وزیراعظم محمدشہباز شریف نے کہا کہ پاکستان اقوام عالم کے شانہ بشانہ آج کے دن انسانیت، انسانی اقدار، اخلاقیات اور تہذیب و تمدن کے علمبرداروں کو خراج تحسین پیش کرتا ہے، انسانیت کا عالمی دن اس سال ’’عالمی جذبہ خیر سگالی اور مقامی کیمونٹی کی افادیت اور مضبوطی‘‘کے عنوان سے منایا جارہا ہے۔

(جاری ہے)

انہوں نے کہا کہ پاکستان کے لئے آج کا دن انسانیت کی خدمت اور حفاظت کے جذبہ کیلئے عزم نو اور تجدید عہد کا موقع ہے، ہم تہہ دل سے ان تمام رضاکاروں کے عزم وہمت، بہادری اور غیر متزلزل جذبہ کو سلام پیش کرتے ہیں جو مصیبت میں گھرے لوگوں کو امداد پہنچاتے ہیں۔ وزیراعظم نے کہا کہ رضاکار خدمت گار بلاشبہ حادثات، قدرتی آفات اور دیگر ایمرجنسی حالات میں اپنے نواحی علاقوں میں فوری امداد پہنچانے میں اہم کردار ادا کرتے ہیں، ہمارے معاشرے میں بیلوث خدمت، دوسروں کی امداد اور فلاحی کاموں میں شرکت کو قدر کی نگاہ سے دیکھا جاتا ہے، انسانیت کی خدمت کا یہ پرخلوص جذبہ پاکستان کی سماجی و معاشرتی اقدار اور تہذیب کا اثاثہ ہے اور ہم من الحیث القوم اس پر فخر کرتے ہیں اور اس بات کا اعادہ بھی کرتے ہیں کہ ہم اپنی آنے والی نسلوں کو انسانیت پرور اور اپنی روشن معاشرتی اساس سے وابستہ تربیت دیں گے۔

انہوں نے کہا کہ ایک اور قابل فخر رویہ جو ہمارے معاشرے کا خاصا ہے ،وہ خواتین، بزرگ اور بچوں کی خصوصی حفاظت اور عزت و تکریم ہے، کسی بھی ناگہانی آفت اور حالات میں ان طبقات کو مدد اور تحفظ کی زیادہ ضرورت ہوتی ہے، ہمارا معاشرہ بحیثیت مجموعی انسانیت کی خدمت کے لئے ہر دم تیار نظر آتا ہے۔ انہوں نے کہا کہ اس سال موسمی حالات کی شدت نے ملک کے طول و عرض میں غیر معمولی صورتحال کو جنم دیا اور ہم نے وفاقی و صوبائی حکومتوں، حکومتی اداروں کے ساتھ عوام کو بھی امدادی کارروائیوں میں رضاکارانہ طور پر پیش پیش دیکھا۔

انہوں نے کہا کہ ہماری عوام دیگر ہنگامی صورتحال جس میں بھوک افلاس، بے روزگاری، جنگی حالات شامل ہیں، اس میں بھی ایک دوسروں کو اپنی استطاعت کے مطابق سہولت و امداد پہنچاتے ہیں، ہمارا ملک دنیا میں عطیات کرنے والے سر فہرست ممالک میں آتا ہے، اسی جذبہ و ایثار کی بدولت کوئی غریب بھوکا نہیں رہتا۔ وزیراعظم نے کہا کہ حکومت پاکستان تمام شہریوں کے حقوق کے تخفظ اور ان کے معیار زندگی بہتر کرنے کے لئے پر عزم ہے اور ساتھ ساتھ رضا کار خدمت گاروں کی حفاظت اور حوصلہ افزائی بھی حکومت کے ترجیحات میں شامل ہے۔

انہوں نے کہا کہ آیئے اس دن کو بحیثیت قوم اس عزم سے منائیں کہ نہ صرف اپنے مقامی علاقے، شہر، ملک بلکہ حسب توفیق دنیا بھر میں انسانیت کی حفاظت اور انسانی اقدار کے فروغ کیلئے تعمیری اور موثر کردار ادا کرنا ہے۔