فیلڈ مارشل سے چینی وزیر خارجہ کی ملاقات،اسٹریٹیجک شراکت داری مضبوط بنانے کا عزم

خطے میں امن، استحکام اور خوشحالی کے لیے دونوں ممالک اپنا مشترکہ کردار ادا کرتے رہیں گے، ملاقات میں اتفاق

جمعہ 22 اگست 2025 12:53

فیلڈ مارشل سے چینی وزیر خارجہ کی ملاقات،اسٹریٹیجک شراکت داری مضبوط ..

راولپنڈی(اُردو پوائنٹ اخبارتازہ ترین - این این آئی۔ 22 اگست2025ء)فیلڈ مارشل سید عاصم منیر سے چینی وزیر خارجہ نے ملاقات کی ، جس میں دونوں ملکوں کے درمیان اسٹریٹیجک شراکت داری مضبوط بنانے کے عزم کا اعادہ کیا گیا۔آئی ایس پی آرکے مطابق اس اہم ملاقات میں علاقائی سلامتی کی صورتحال، انسداد دہشت گردی کے اقدامات سمیت باہمی دلچسپی کے دیگر امور پر بھی تفصیلی تبادلہ خیال کیا گیا۔

(جاری ہے)

دونوں رہنماؤں نے اس عزم کو دہرایا کہ پاکستان اور چین کے درمیان ہر موسم کی اسٹریٹیجک شراکت داری کو مزید مستحکم کیا جائے گا اور علاقائی و عالمی فورمز پر قریبی تعاون کو فروغ دیا جائے گا۔اس موقع پر چینی وزیر خارجہ وانگ ای نے پاکستان کی خودمختاری اور ترقی کیلئے چین کی غیر متزلزل حمایت کا اعادہ کیا،جبکہ آرمی چیف نے مشکل حالات میں چین کی مستقل حمایت پر شکریہ ادا کیا۔ملاقات میں اس بات پر بھی اتفاق کیا گیا کہ خطے میں امن، استحکام اور خوشحالی کے فروغ کیلئے دونوں ممالک اپنا مشترکہ کردار ادا کرتے رہیں گے۔