بلند ترین امریکی ٹیرف کے باوجود بھارتی وزیر خارجہ کی روسی ہم منصب سے ملاقات، تجارت بڑھانے پر اتفاق

توانائی وسائل نکالنے کے منصوبوں میں روس کے مشرق بعید اور آرکیٹک شیلف کے علاقے بھی شامل ہیں،وزارئے خارجہ کی گفتگو

جمعہ 22 اگست 2025 13:25

نئی دہلی (اُردو پوائنٹ اخبارتازہ ترین - این این آئی۔ 22 اگست2025ء)بھارتی وزیر خارجہ جے شنکر نے روسی ہم منصب سرگئی لاروف سے ملاقات کے دوران روس بھارت تجارتی تعلقات بڑھانے پر اتفاق کیا ہے۔غیر ملکی خبر رساں ادارے کے مطابق بھارت کو روسی تیل خریدنے پر امریکا کی طرف سے بلندترین ٹیرف کا سامنا ہے، اگر بھارت روس سے تیل کی خریداری نہیں روکتا تو بھارت پر اضافی 50 فیصد امریکی ٹیرف کا اطلاق اگلے ہفتے سے ہوگا۔

امریکا کی جانب سے بلند ترین ٹیرف کے باوجود بھارتی وزیرخارجہ جے شنکر نے ماسکو میں روسی ہم منصب سرگئی لاروف سے ملاقات کی جس میں دونوں ممالک نے تجارتی تعلقات بڑھانے پر اتفاق کیا۔اس موقع پر روسی وزیر خارجہ سرگئی لاروف کا کہنا تھا کہ توانائی وسائل کے لیے مشترکہ منصوبوں پر عمل درآمد میں ہمارا باہمی مفاد ہے، توانائی وسائل نکالنے کے منصوبوں میں روس کے مشرق بعید اور آرکیٹک شیلف کے علاقے بھی شامل ہیں۔

(جاری ہے)

دوسری جانب بھارتی وزیر خارجہ جے شنکر کا کہنا تھا کہ ملاقات میں روس اور بھارت نے 2 طرفہ تجارت کو وسعت دینے کے عزم کا اعادہ کیا، تجارتی تعلقات میں وسعت کے لیے رکاوٹوں اور ریگولیٹری مسائل دور کرنا ضروری ہے۔جیشنکر نے مزید کہا کہ فارماسیوٹیکل، زراعت اور ٹیکسٹائل میں روس کو برآمدات میں اضافہ کر رہے ہیں۔