نو مئی ایک ناکام بغاوت تھی، اسکے کردار کسی رعایت کے مستحق نہیں‘عظمیٰ بخاری

جمعہ 22 اگست 2025 18:24

لاہور (اُردو پوائنٹ اخبارتازہ ترین - این این آئی۔ 22 اگست2025ء) وزیر اطلاعات و ثقافت پنجاب عظمی بخاری نے کہا ہے کہ 9مئی کو ہونے والی ریاست دشمن کارروائی ایک منظم اور ناکام بغاوت تھی، جس کے تمام شواہد قوم کے سامنے آ چکے ہیں۔ انہوں نے اپنے بیان میں کہا کہ اس سازش میں ملوث عناصر اب سیاسی لبادہ اوڑھ کر خود کو نہیں چھپا سکتے۔عظمی بخاری نے سوال اٹھایا کہ سیاست کی آڑ میں ریاستی اداروں پر حملہ کرنے اور شہدا کے مجسمے جلا کر کون سی قوم کی خدمت کی گئی 9 مئی کے حملوں نے عالمی سطح پر پاکستان کو شرمندگی سے دوچار کیا۔

(جاری ہے)

انہوں نے کہا کہ اب یہ ممکن نہیں کہ ریاست دشمنی کو انتقامی سیاست کا نام دے کر خود کو مظلوم ظاہر کیا جائے۔ قوم 9 مئی کے ماسٹر مائنڈز اور سہولت کاروں کا کڑا اور مکمل احتساب چاہتی ہے۔وزیر اطلاعات پنجاب کا کہنا تھا کہ مقبولیت تو فرعون اور شیطان کی بھی تھی، مگر وہ فرشتے نہیں بن سکتے۔ 9 مئی کے مرکزی کرداروں کی تمام چالیں اور تحاریک ناکام ہو چکی ہیں، اب وقت ہے کہ وہ اپنے گناہوں کا حساب دیں۔انہوں نے واضح کیا کہ حکومت اور ادارے ریاست کے خلاف ہر سازش کو ناکام بنانے کے لیے پرعزم ہیں، اور قانون کے مطابق ہر کردار کو اس کے انجام تک پہنچایا جائے گا۔