پاکستان کو جولائی میں 208.1ملین ڈالر کی غیر ملکی سرمایہ کاری موصول، چین 25فیصد کیساتھ سرفہرست

جمعہ 22 اگست 2025 22:00

اسلا م آباد (اُردو پوائنٹ اخبارتازہ ترین - این این آئی۔ 22 اگست2025ء)پاکستان کو مالی سال 2025-26ء کے ابتدائی ماہ جولائی میں 208.1ملین ڈالر کی خالص غیر ملکی براہ راست سرمایہ کاری (ایف ڈی آئی)موصول ہوئی ہے، جس میں چین سب سے بڑا سرمایہ کار ملک بن کر سامنے آیا ہے۔ گوادر پرو کے مطابق اسٹیٹ بینک آف پاکستان کی جانب سے جاری کیے گئے تازہ ترین اعداد و شمارسے معلوم ہوا کہ چین کی جانب سے جولائی میں 51.5 ملین ڈالر کی خالص سرمایہ کاری کی گئی، جو مجموعی ایف ڈی آئی کا 24.7 فیصد بنتی ہے۔

چین سے مجموعی سرمایہ کاری 89 ملین ڈالر ریکارڈ کی گئی، تاہم 37.6 ملین ڈالر کی رقم واپس جانے کے بعد خالص سرمایہ کاری 51.5 ملین ڈالر رہ گئی۔ گوادر پرو کے مطابق جولائی کے دوران دیگر نمایاں سرمایہ کار ممالک میں کینیڈا 37.8ملین ڈالر، ہانگ کانگ 30.1 ملین ڈالر، سوئٹزرلینڈ 20.6ملین ڈالر، متحدہ عرب امارات 19.7ملین ڈالر، برطانیہ 16.9ملین ڈالر، سنگاپور 9.1ملین ڈالر، اور امریکہ 3.6 ملین ڈالر شامل تھے۔

(جاری ہے)

باقی سرمایہ کاری دیگر شراکت دار ممالک سے آئی۔ گوادر پرو کے مطابق گزشتہ مالی سال25 - 2024کے دوران پاکستان کو مجموعی طور پر 2.46 ارب ڈالر کی ایف ڈی آئی موصول ہوئی تھی، جس میں سے 49.9 فیصد یعنی 1.22 ارب ڈالر صرف چین سے آئے۔ یہ سرمایہ کاری مالی سال24 - 2023 کے مقابلے میں تقریبا دوگنی ہے، جب بیجنگ سے 643.2 ملین ڈالر موصول ہوئے تھے۔ گوادر پرو کے مطابق تازہ اعداد و شمار نئے مالی سال کے لیے ایک مثبت آغاز کی عکاسی کرتے ہیں، جو کہ چین کے وزیر خارجہ اور کمیونسٹ پارٹی آف چائنا ( سی پی سی) کی سینٹرل کمیٹی کے سیاسی بیورو کے رکن، وانگ ای کی اسلام آباد آمد کے موقع پر سامنے آئے ہیں۔

وہ پاکستان اور چین کے وزرائے خارجہ کے چھٹے اسٹریٹجک مکالمے میں شرکت کے لیے آئے ، جو 21 اگست 2025 کو منعقد ہوا۔ اس مکالمے کی مشترکہ صدارت وانگ ای اور پاکستان کے نائب وزیراعظم و وزیر خارجہ اسحاق ڈار نے کی۔