افغان فیملی کی پاکستانی شہریت اور شناختی کارڈ کے حصول سے متعلق درخواست ناقابل سماعت قرار

جمعرات 28 اگست 2025 15:17

لاہور(اُردو پوائنٹ اخبارتازہ ترین - این این آئی۔ 28 اگست2025ء)لاہور ہائیکورٹ نے افغان فیملی کی پاکستانی شہریت اور شناختی کارڈ کے حصول سے متعلق درخواست ناقابل سماعت قرار دے کر خارج کر دی۔لاہور ہائیکورٹ کے جسٹس عابد حسین چھٹہ نے بی بی ترینہ، عبدالوکیل اور ان کے بیٹے محمد شکیب کی جانب سے دائر درخواست پر سماعت کی۔درخواست میں موقف اختیار کیا گیا تھا کہ بی بی ترینہ کی پیدائش کراچی جبکہ عبدالوکیل کی پیدائش ہری پور (خیبر پختونخواہ)میں ہوئی۔

(جاری ہے)

دونوں نے 1995میں پسند کی شادی کی تھی جس سے ان کے پانچ بچے محمد شکیب، محمد وحید، محمد عثمان، محمد نعمان اور آمنہ پیدا ہوئے۔درخواست گزاروں کے مطابق پولیس انہیں زبردستی افغانستان بھجوانا چاہتی ہے جبکہ پسند کی شادی کے بعد وہاں انہیں جان کا خطرہ لاحق ہے۔وکیل درخواست گزار نے دلائل دئیے کہ پاکستان سٹیزن شپ ایکٹ 1951کی شق 4کے تحت ان کے موکلین پاکستانی شہریت کے حق دار ہیں۔ درخواست میں استدعا کی گئی کہ عدالت وزارت داخلہ کو فیملی کو پاکستانی شہریت دینے اور نادرا کو شناختی کارڈ جاری کرنے کا حکم دے۔ عدالت نے ابتدائی دلائل سننے کے بعد قرار دیا کہ درخواست ناقابل سماعت ہے اور اس بنیاد پر درخواست مسترد کر دی گئی۔