لاہورہائیکورٹ نے افغان فیملی کی شہریت کی درخواست مسترد کردی

جمعرات 28 اگست 2025 22:51

ٍلاہور(اُردو پوائنٹ اخبارتازہ ترین - آن لائن۔ 28 اگست2025ء)لاہور ہائیکورٹ نے ایک افغان فیملی کی پاکستانی شہریت اور شناختی کارڈ کے حصول سے متعلق درخواست ناقابلِ سماعت قرار دے کر خارج کر دی۔ جسٹس عابد حسین چھٹہ نے بی بی ترینہ، عبدالوکیل اور ان کے بیٹے محمد شکیب کی جانب سے دائر درخواست پر سماعت کی۔درخواست میں مؤقف اختیار کیا گیا تھا کہ بی بی ترینہ کی پیدائش کراچی جبکہ عبدالوکیل کی پیدائش ہری پور (خیبرپختونخوا) میں ہوئی۔

(جاری ہے)

دونوں نے 1995 میں پسند کی شادی کی تھی، جس سے ان کے پانچ بچے محمد شکیب، محمد وحید، محمد عثمان، محمد نعمان اور آمنہ پیدا ہوئے۔درخواست گزاروں کے مطابق پولیس انہیں زبردستی افغانستان بھجوانا چاہتی ہے جبکہ پسند کی شادی کے بعد وہاں انہیں جان کا خطرہ لاحق ہے۔ وکیل درخواست گزار نے مؤقف اپنایا کہ پاکستان سٹیزن شپ ایکٹ 1951 کی شق 4 کے تحت ان کے مؤکلین پاکستانی شہریت کے حق دار ہیں۔ درخواست میں استدعا کی گئی کہ عدالت وزارت داخلہ کو فیملی کو پاکستانی شہریت دینے اور نادرا کو شناختی کارڈ جاری کرنے کا حکم دے۔عدالت نے ابتدائی دلائل سننے کے بعد قرار دیا کہ درخواست ناقابلِ سماعت ہے اور اس بنیاد پر اسے مسترد کر دیا گیا۔