Live Updates

وزیراعظم شہباز شریف کو ایرانی صدر ڈاکٹر مسعود پیزشکیان کا ٹیلی فون ، سیلاب سے ہونے والے نقصانات پر پاکستانی عوام سے دلی تعزیت کا اظہار

جمعہ 29 اگست 2025 21:43

لاہور (اُردو پوائنٹ اخبارتازہ ترین - اے پی پی۔ 29 اگست2025ء) وزیراعظم محمد شہباز شریف کو ایران کے صدر ڈاکٹر مسعود پیزشکیان نے ٹیلی فون کیا اور پاکستان کے مختلف علاقوں میں سیلاب سے ہونے والے نقصانات پر پاکستانی عوام سے دلی تعزیت کا اظہار کیا۔

(جاری ہے)

جمعہ کو وزیراعظم آفس کے میڈیا ونگ سے جاری بیان کے مطابق ایرانی صدر نے حالیہ سیلاب میں جانی و مالی نقصان پر متاثرہ خاندانوں سے ہمدردی اور یکجہتی کا اظہار کرتے ہوئے اس مشکل وقت میں پاکستان کے برادر عوام کو ہر ممکن مدد فراہم کرنے کی پیشکش کی۔

وزیر اعظم نے صدر مسعود پیزشکیان کی جانب سے ہمدردی و یکجہتی کے اظہار اور ایرانی بہن بھائیوں کی طرف سے دکھ اور تکلیف کی اس گھڑی میں اظہار یکجہتی پر شکریہ ادا کیا۔ وزیراعظم نے ایرانی صدر کو ایران کے سپریم لیڈر آیت اللہ علی خامنہ ای کیلئے گہرے احترام اور نیک خواہشات کا پیغام دیا۔ دونوں رہنماؤں نے چین کے شہر تیانجن میں ہونے والے شنگھائی تعاون تنظیم کے آئندہ سربراہی اجلاس کے موقع پر متوقع ملاقات و گفتگو کے حوالے سے مثبت خیالات کا بھی اظہار کیا۔