Live Updates

پاکستان کرکٹ ٹیم کے سابق کپتان و مایہ ناز آل راؤنڈر شاہد آفریدی کا ملک سعد شہید پولیس لائن کا دورہ

اتوار 31 اگست 2025 20:10

پشاور (اُردو پوائنٹ اخبارتازہ ترین - اے پی پی۔ 31 اگست2025ء) پاکستان کرکٹ ٹیم کے سابق کپتان اور سپر اسٹار آل راؤنڈر شاہد آفریدی نے ملک سعد شہید پولیس لائن پشاور کا خصوصی دورہ کیا۔ اتوار کو دورہ کے موقع پر سی سی پی او پشاور ڈاکٹر میاں سعید احمد اور ایس ایس پی آپریشنز مسعود احمد نے معزز مہمان کا پرتپاک استقبال کیا۔ شاہد آفریدی نے یادگارِ شہداء پر حاضری دی، پھول چڑھائے اور دعا کی۔

بعدازاں سی سی پی او پشاور ڈاکٹر میاں سعید احمد سے ملاقات کے دوران امن و امان کی صورتحال اور عوامی خدمات کے حوالے سے بریفنگ دی گئی۔ شاہد آفریدی نے حالیہ سیلاب متاثرین کیلئے منعقدہ میچ کے دوران پشاور پولیس کی مثالی اور پروفیشنل سکیورٹی انتظامات کو سراہا اور کہا کہ سکیورٹی کے بہترین انتظامات کی بدولت نیشنل اور انٹرنیشنل میچز کا انعقاد بھی پشاور میں کیا جا سکتا ہے جس پر سی سی پی او نے ان کو یقین دہانی کرائی کہ کسی بھی انٹرنیشنل اور نیشنل ایونٹ کی صورت میں پشاور پولیس سکیورٹی کو یقینی بنائےگی۔

(جاری ہے)

ملاقات کے دوران شاہد آفریدی نے خیبر پختونخوا پولیس کی دہشت گردی کے خلاف قربانیوں کو زبردست خراج عقیدت پیش کرتے ہوئے کہا کہ پشاور پولیس نے عوام کی جان و مال کے تحفظ کے لئے ہمیشہ فرنٹ لائن کا کردار ادا کیا ہے جس پر پوری قوم کو فخر ہے۔ شاہد آفریدی نے کہا کہ وہ خود کو پختون قوم کا فرد سمجھتے ہیں اور پشاور، خیبر اور خیبر پختونخوا کے عوام سے ان کا گہرا تعلق اور محبت ہے۔ انہوں نے کہا کہ وہ ہر مشکل گھڑی میں اپنے غیور عوام کے ساتھ کھڑے رہیں گے۔ آخر میں انہوں نے اپنی اور پشاور زلمی کی جانب سے پشاور پولیس اور ضلعی انتظامیہ کا شکریہ ادا کرتے ہوئے پشاور پولیس کو ایک پروفیشنل اور بہترین فورس قرار دیا۔