ایم کیو ایم پاکستان کے یوتھ فورم کا اہم اجلاس، نوجوانوں کے مستقبل اور تنظیمی کردار پر ڈاکٹر فاروق ستار کا خطاب

نوجوان ہی تحریک کا اصل سرمایہ ہیں، یوتھ فورم کے اراکین کو تنظیمی امور میں بھرپور کردار ادا کرنا ہوگا، یوتھ فورم نوجوانوں کو سیاست، تنظیمی ڈھانچے اور قیادت کے میدان میں آگے بڑھانے کا پلیٹ فارم ہے، ڈاکٹر فاروق ستار

اتوار 31 اگست 2025 21:20

کراچی(اُردو پوائنٹ اخبارتازہ ترین - این این آئی۔ 31 اگست2025ء)متحدہ قومی موومنٹ پاکستان کے مرکزی شعبہ یوتھ فورم کا ایک اہم اجلاس بہادرآباد مرکز میں منعقد ہوا، جس کی صدارت ایم کیو ایم پاکستان کے سینئر رہنما ڈاکٹر فاروق ستار نے کی۔ اجلاس میں یوتھ فورم کے انچارج اور صوبائی اسمبلی کے رکن عدیل عسکری کے ہمراہ یوتھ فورم کے اراکین بڑی تعداد میں شریک ہوئے۔

اجلاس سے خطاب کرتے ہوئے ڈاکٹر فاروق ستار نے کہا کہ نوجوان ہی تحریک کا اصل سرمایہ ہیں، اور آج کا نوجوان ہی آنے والے کل کی قیادت ہے، اس لیے ضروری ہے کہ یوتھ فورم کے اراکین تنظیمی امور میں بھرپور دلچسپی لیں اور آئندہ کے عملی لائحہ عمل میں اپنی توانائیاں صرف کریں۔ انہوں نے کہا کہ یوتھ فورم نوجوانوں کے لیے ایک ایسا پلیٹ فارم ہے جس کے ذریعے انہیں سیاست، تنظیمی ڈھانچے اور قیادت کے عملی میدان میں آگے بڑھنے کے مواقع میسر آئیں گے۔

(جاری ہے)

ڈاکٹر فاروق ستار نے اراکین کو آئندہ کے لائحہ عمل پر تفصیلی روشنی ڈالی اور کہا کہ تحریک کے تسلسل اور مضبوطی کے لیے نوجوانوں کا ہر سطح پر فعال کردار ناگزیر ہے۔ اس موقع پر انچارج یوتھ فورم عدیل عسکری نے کہا کہ نوجوانوں کو منظم اور متحد ہو کر میدان میں آنا ہوگا تاکہ تحریک کے پیغام کو گھر گھر پہنچایا جا سکے اور شہری سندھ کے عوام کے مسائل کے حل کے لیے جدوجہد کو تیز کیا جا سکے۔ اجلاس میں شریک یوتھ فورم کے اراکین نے بھی اپنی تجاویز اور آرا پیش کیں اور تحریک کے ساتھ اپنی غیر متزلزل وابستگی کا اعادہ کیا۔