پاک فوج کے ایم آئی 17 ہیلی کاپٹر حادثے میں 2 میجر بھی شہید ہوئے، آئی ایس پی آر

حادثہ تقریباً 10 بجے پیش آیا، ہیلی کاپٹر تھکداس کینٹ سے 12 کلومیٹر فاصلے پر کریش لینڈنگ کے بعد تباہ ہوا؛ ترجمان پاک فوج کی تصدیق

ساجد علی پیر 1 ستمبر 2025 15:38

پاک فوج کے ایم آئی 17 ہیلی کاپٹر حادثے میں 2 میجر بھی شہید ہوئے، آئی ایس ..

راولپنڈی ( اُردو پوائنٹ اخبارتازہ ترین۔ 01 ستمبر 2025ء ) گلگت بلتستان کے ضلع دیامر کے علاقے چلاس میں پاک فوج کا ایم آئی 17 ہیلی کاپٹر گر کر تباہ ہوا، اس حادثے میں 2 میجر سمیت عملے کے 5 ارکان شہید ہوگئے۔ پاک فوج کے شعبہ تعلقات عامہ (آئی ایس پی آر) کے مطابق پاک فوج کا ایم آئی 17 ہیلی کاپٹر تربیتی پرواز کے دوران ہُڈور گاؤں کے قریب گر کر تباہ ہوا، ہیلی کاپٹر صبح تقریباً 10 بجے حادثہ پیش آیا جہاں ہیلی کاپٹر تھکداس کینٹ سے تقریباً 12 کلومیٹر کے فاصلے پر کریش لینڈنگ کے بعد تباہ ہوا، ہیلی کاپٹر حادثے میں پائلٹ اور معاون پائلٹ سمیت عملے کے 5 ارکان جامِ شہادت نوش کرگئے، شہداء میں پائلٹ ان کمانڈر میجر عاطف، کو پائلٹ میجر فیصل، فلائٹ انجینئر نائب صوبیدار سبحان مقبول، کریو چیف حوالدار جہانگیر اور کریو چیف نائیک عامر شامل ہیں۔

(جاری ہے)

ترجمان پاک فوج نے بتایا کہ ہیلی کاپٹر تربیتی پرواز پر تھا جب اسے تکنیکی خرابی پیش آئی، آرمی ایوی ایشن کی تربیتی پروازیں معمول کا حصہ ہیں تاکہ آپریشنل تیاری کو ہر وقت یقینی بنایا جا سکے، یہ تربیت دفاعی ذمہ داریوں کے ساتھ ساتھ انسانی ہمدردی پر مبنی امدادی و بحالی کے مشنز کے لیے بھی ناگزیر ہے، ملک کے دفاع اور عوامی خدمت کے ہر پہلو میں بھرپور تیاری یقینی بنائی جائے گی۔

دوسری طرف وزیر اعلیٰ گلگت بلتستان اور گورنر نے دیامر میں ہیلی کاپٹر گرنے کے نتیجے میں ہونے والی شہادتوں پر گہرے دکھ اور افسوس کا اظہار کیا ہے ، گلگت بلتستان حکومت کے ترجمان فیض اللہ فراقی نے ایک بیان میں تصدیق کی کہ’ ہیلی کاپٹر تھور چلاس میں گر کر تباہ ہوا، ہیلی کاپٹر میں دو پائلٹ اور تکنیکی عملے کے 3 ارکان سوار تھے‘، جب کہ دیامر کے سینئر سپرنٹنڈنٹ پولیس عبدالحمید نے بتایا کہ ’ہیلی کاپٹر ایک مجوزہ نئے ہیلی پیڈ پر ٹیسٹ لینڈنگ کر رہا تھا کہ اس دوران حادثے کا شکار ہوگیا، ہیلی کاپٹر کے اس حادثے میں 5 افراد کے جاں بحق ہونے اطلاعات ہیں، دیامر پولیس اور ریسکیو ٹیمیں فوری طور پر جائے حادثہ پر پہنچ گئیں اور امدادی کارروائیاں شروع کر دی گئیں، تاہم حادثے کی وجوہات کے بارے میں ابھی تک کچھ کہنا قبل از وقت ہوگا‘۔