Live Updates

عید میلاد النبیﷺ اور یومِ دفاع پاکستان کے موقع پر صوبائی وزیر سوشل ویلفیئر و بیت المال کا خصوصی پیغام

ہفتہ 6 ستمبر 2025 16:50

لاہور (اُردو پوائنٹ اخبارتازہ ترین - اے پی پی۔ 06 ستمبر2025ء) صوبائی وزیر سوشل ویلفیئر و بیت المال پنجاب سہیل شوکت بٹ نے عید میلاد النبیﷺ اور یومِ دفاع پاکستان کے موقع پر قوم کو دلی مبارکباد پیش کی ہے۔ اپنے خصوصی پیغام میں انہوں نے کہا کہ آقائے دوجہاں حضرت محمد مصطفیﷺ کی ولادتِ باسعادت کا مقدس مہینہ ربیع الاول ہمیں سیرتِ طیبہ پر عمل کی یاد دہانی کراتا ہے۔

نبی کریم ﷺنے انسانیت کی خدمت، ایثار، رواداری اور اخوت کا درس دیا، جس پر عمل پیرا ہو کر ہم ایک پرامن اور مثالی معاشرہ تشکیل دے سکتے ہیں۔سہیل شوکت بٹ نے کہا کہ حالیہ سیلاب متاثرین کی امداد اور خدمت دراصل حضورﷺ کی تعلیمات پر عملداری کا عملی نمونہ ہے۔ ہمیں چاہیے کہ ہم ہر لمحہ ان اقدار کو اپنی زندگی کا حصہ بنائیں۔

(جاری ہے)

یومِ دفاع پاکستان کے حوالے سے اپنے بیان میں انہوں نے کہا کہ 6 ستمبر ہماری تاریخ کا وہ دن ہے جو قومی اتحاد، قربانی اور جذبہ حب الوطنی کی روشن مثال ہے۔

پاک فوج اور عوام نے مل کر دشمن کے ناپاک عزائم کو ناکام بنایا اور وطن عزیز کا دفاع یقینی بنایا۔صوبائی وزیر نے مزید کہا کہ آج بھی وہی جذبہ خدمت اور قربانی ہمارے دلوں میں زندہ ہے۔ وزیراعظم میاں شہباز شریف اور وزیراعلی پنجاب محترمہ مریم نواز کی قیادت میں صوبہ پنجاب اتحاد، ترقی اور خوشحالی کی راہ پر گامزن ہے۔آخر میں انہوں نے پاکستان کی سلامتی، ترقی اور خوشحالی کے لیے دعا کرتے ہوئے "پاکستان زندہ باد" کا نعرہ بلند کیا۔