مذہبی تعلیمات اور بانیانِ قوم کے وژن کے مطابق بین المذاہب ہم آہنگی کے فروغ کیلئے پرعزم ہیں، وفاقی وزیر سردار یوسف

پیر 8 ستمبر 2025 22:19

راولپنڈی (اُردو پوائنٹ اخبارتازہ ترین - اے پی پی۔ 08 ستمبر2025ء) وفاقی وزیر مذہبی امور سردار محمد یوسف نے کہا ہے کہ مذہبی تعلیمات اور بانیانِ قوم کے وژن کے مطابق بین المذاہب ہم آہنگی کے فروغ کے لیے پرعزم ہیں اورہم سب مل کر عدم برداشت اور انتہاپسندی کو شکست دیں گے۔یہ بات انہوں نے پیر کو یہاں امن و بین المذاہب ہم آہنگی کے موضوع پر منعقدہ کانفرنس سے خطاب کرتے ہوئے کی۔

کانفرنس میں مختلف ممالک کے سفیروں سمیت امام بادشاہی مسجد مولانا سید عبد الخبیر آزاد، صوبائی وزیر برائے اقلیتی امور پنجاب سردار رمیش سنگھ اروڑہ، ڈاکٹر پال بھٹی (شہباز بھٹی فاؤنڈیشن کے نمائندہ) اور مختلف مذاہب کے رہنماؤں نے شرکت کی۔ڈاکٹر پال بھٹی نے شرکاء کو خوش آمدید کہا اور کانفرنس کے مقاصد پر روشنی ڈالتے ہوئے کہا کہ امن اور ہم آہنگی کی ضرورت سرحدوں اور مذاہب سے بالاتر ہے۔

(جاری ہے)

صوبائی وزیر رمیش سنگھ اروڑہ نے اپنے خطاب میں قائداعظم محمد علی جناح کے وژن کو دہرایا کہ پاکستان میں ہر شہری کو برابر کے حقوق حاصل ہوں گے۔ انہوں نے شہباز بھٹی شہید کو خراجِ عقیدت پیش کیا اور کہا کہ امن قائم کرنا انصاف، باہمی احترام اور ہمدردی پر مبنی معاشرہ تشکیل دینا ہے۔ انہوں نے یقین دلایا کہ وزیراعلیٰ پنجاب مریم نواز شریف کی قیادت میں صوبائی حکومت اقلیتوں کے حقوق کے تحفظ اور بین المذاہب مکالمے کو فروغ دینے کے لیے پرعزم ہے۔

مولانا عبد الخبیر آزاد نے کہا کہ اسلام کا اصل پیغام امن، برداشت اور پوری انسانیت کا احترام ہے۔ اس نوعیت کی کانفرنسیں مختلف مذاہب کے ماننے والوں کو قریب لانے میں کلیدی کردار ادا کرتی ہیں۔ویٹی کن کے سفیر نے کہا کہ مذاہب کے درمیان مکالمہ ناگزیر ہی نہیں بلکہ عالمی امن کے لیے بنیادی ضرورت ہے۔ پاکستان کی کوششیں دنیا کے لیے ایک مثبت مثال ہیں۔اٹلی کے سفیر نے کہا کہ اٹلی، پاکستان کی ہم آہنگی اور پرامن بقائے باہمی کی کوششوں میں اس کے ساتھ کھڑا ہے۔ جب تنوع کا احترام کیا جائے تو یہ کسی قوم کی اصل طاقت بن جاتا ہے۔