[ اسرائیل نے عالمی استعمار و سامراج کی پشت پناہی سے فلسطین خصوصا غزہ میں عبادت گاہوں سمیت تعلیمی اداروں کوتباہ کردیا،ساجد نقوی

+اسلام آباد(اُردو پوائنٹ اخبارتازہ ترین - آن لائن۔ 08 ستمبر2025ء) قائد ملت جعفریہ پاکستان علامہ سید ساجد علی نقوی نے کہاکہ تعلیم سب کیلئے لازم ہے‘ اسرائیل نے عالمی استعمار و سامراج کی پشت پناہی سے فلسطین خصوصا غزہ میں عبادت گاہوں سمیت تعلیمی اداروں کوتباہ کردیا ہے انہوں نے کہاکہ افسوس اقوام متحدہ سمیت عالمی ادارے ان حملوں کو روکنے سے قاصر رہے۔

ا نہوں نے کہاکہ9ستمبر کو آئندہ سال سے غزہ کے مظلوم طلباو اساتذہ کیساتھ منسوب کیا جائے ان خیالات کااظہار قائد ملت جعفریہ پاکستان علامہ سیدساجد علی نقوی نے خواندگی و تعلیم کو حملوں سے بچانے بارے عالمی ایام پر اپنے پیغام میں کیا قائد ملت جعفریہ پاکستان نے متوجہ کیا کہ 2023کی مردم شماری اور اس کے بعد جاری اقتصادی سروے میں جو اعدادو شمار سامنے آئے اس کے مطابق پاکستان کی 60 سے 65فیصد آبادی خواندہ جن میں مردوں کی شرح68 اور خواتین کی 52.8 فیصد جو حوصلہ افزانہیں، تیز رفتار دنیا کیساتھ چلنے اور ترقی کیلئے لازم ہے کہ پاکستانی معاشرہ جہالت کے اندھیروں سے نکل کر تعلیم کے نور سے منور ہو کیونکہ جہالت تمام مسائل کی جڑ ہے۔

(جاری ہے)

اسلام کا سب سے پہلا آفاپی پیغام بھی پڑھنے پڑھانے کا ہے مگر افسوس اس اہم ترین سماجی مسئلے کی جانب جس طرح سے وفاقی و صوبائی حکومتوں کو اقدامات اٹھانا چاہئیں وہ ناکافی ہیں۔قائد ملت جعفریہ پاکستان علامہ سید ساجد علی نقوی نے مزید کہاکہ تعلیم کو حملوں سے بچانے کا عالمی دن منایا جائے مگر ایسے وقت میں یہ ایام تواتر کیساتھ آرہے ہیں جب عالمی استعمار و سامراج کی پشت پناہی سے صہیونیت انسانیت کو تاراج کررہی ہے، عبادت گاہوں، شفاخانوں(اسپتالوں)، رہائشی عمارتوں سے لے کر تعلیمی اداروں تک کو اسرائیلی سفاکانہ حملوں کا سامنا ہے، تعلیمی اداروں سمیت کم سن بچے ٹیچرز سمیت شہید کئے جاچکے ہیں مگر افسوس اقوا م متحدہ سمیت عالمی ادارے ان حملوں کو روکنے سے قاصر رہے لازم ہے کہ 2025سے 9 ستمبر کو عہد کرتے ہوئے آئندہ سے یہ دن فلسطینی خصوصا غزہ کے تعلیمی اداروں کیساتھ منسوب کیا جائے تاکہ رہتی دنیا تک نہ صرف غزہ کے شعبہ تعلیم سے وابستگان کی یاد تازہ رہے بلکہ آنیوالی نسلوں کو بھی صہیونی مظالم بارے آگاہی دی جاسکے۔

اعجاز خان