لوئر دیر میں سکیورٹی فورسز کا آپریشن، 10 دہشتگرد ہلاک، 7 جوان شہید

جوانوں نے اپنی جانیں قربان کرکے معصوم شہریوں کو محفوظ بنایا جنہیں دہشت گردوں نے یرغمال بنا رکھا تھا، ہلاک خوارج کے قبضے سے اسلحہ اور گولہ بارود برآمد ہوا؛ آئی ایس پی آر

ساجد علی اتوار 14 ستمبر 2025 10:58

لوئر دیر میں سکیورٹی فورسز کا آپریشن، 10 دہشتگرد ہلاک، 7 جوان شہید

راولپنڈی ( اُردو پوائنٹ اخبارتازہ ترین۔ 14 ستمبر 2025ء ) صوبہ خیبرپختونخواہ کے علاقے لوئر دیر میں سکیورٹی فورسز نے کارروائی کرتے ہوئے بھارتی حمایت یافتہ 10 دہشت گردوں کو ہلاک کردیا، اس دوران فائرنگ کے تبادلے میں 7 جوان بھی شہید ہوئے۔ مسلح افواج کے شعبہ تعلقات عامہ (آئی ایس پی آر) کے مطابق سکیورٹی فورسز نے خفیہ اطلاعات کی بنیاد پر لوئر دیر کے علاقے لال قلعہ میدان میں دہشت گردوں کے خلاف انٹیلی جنس بیسڈ آپریشن کیا اور اس دوران فائرنگ کا تبادلہ ہوا، آپریشن کے دوران سکیورٹی اہلکاروں نے دہشت گردوں کے ٹھکانے کو گھیرلیا اور مؤثر طریقے سے نشانہ بنایا، اس دوران شدید فائرنگ کا تبادلہ بھی ہوا، فائرنگ کے تبادلے کے بعد 10 بھارتی حمایت یافتہ خوارج جہنم واصل کردیئے گئے۔

بتایا گیا ہے کہ آپریشن کے دوران پاک فوج کے 7 جوانوں نے بہادری سے لڑتے ہوئے جام شہادت نوش کیا، شہداء میں نائیک عبدالجلیل، نائیک گل جان، لانس نائیک عظمت اللہ، سپاہی عبدالمالک، سپاہی محمد امجد، سپاہی محمد داؤد اور سپاہی فضل قیوم شامل ہیں، ان شہداء میں سے عبدالجلیل کی عمر 39 برس اور تعلق شمالی وزیرستان سے تھا، نائک گل جان کی عمر 38 برس تعلق لکی مروت سے تھا، لانس نائک عظمت اللہ کی عمر 28 سال تعلق لکی مروت سے تھا، سپاہی عبدالمالک کی عمر 28 سال تعلق خیبر سے تھا، سپاہی محمد امجد کی عمر 27 سال اور تعلق ضلع مالاکنڈ سے تھا، سپاہی محمد داؤد کی عمر 28 سال تعلق صوابی سے تھا، سپاہی فضل قیوم کی عمر 21 برس تعلق ڈیرہ اسماعیل خان سے تھا۔

(جاری ہے)

آئی ایس پی آر کا کہنا ہے کہ پاک فوج کے جوانوں نے اپنی جانیں قربان کرکے معصوم شہریوں کو محفوظ بنایا جنہیں دہشت گردوں نے یرغمال بنا رکھا تھا، ہلاک خوارج کے قبضے سے اسلحہ اور گولہ بارود برآمد ہوا، ان دہشت گرد کارروائیوں میں افغان شہری بھی ملوث پائے گئے، علاقے میں کلیئرنس اور سینیٹائزیشن آپریشن جاری ہے تاکہ باقی ماندہ دہشت گردوں کو بھی انجام تک پہنچایا جا سکے، پاکستان نے عبوری افغان حکومت پر زور دیا ہے کہ وہ اپنی ذمہ داریاں پوری کرے اور اپنی سرزمین دہشت گردوں کو استعمال نہ کرنے دے۔