Live Updates

حافظ نعیم الرحمن کا دریا کنارے ہاؤسنگ سوسائٹیوں کیخلاف احتجاج اعلان

منگل 9 ستمبر 2025 22:34

لاہور (اُردو پوائنٹ اخبارتازہ ترین - آن لائن۔ 09 ستمبر2025ء) امیر جماعت اسلامی پاکستان حافظ نعیم الرحمن نے دریاؤں کے قدرتی راستوں پر قائم ہاؤسنگ سوسائٹیوں کے خلاف احتجاج کا اعلان کر دیا۔چوہنگ میں الخدمت فاؤنڈیشن کی خیمہ بستی کے دورے کے موقع پر میڈیا سے گفتگو کرتے ہوئے انہوں نے کہا کہ جعلی این او سی حاصل کرکے دریائی زمین پر تعمیرات کرنے والوں کے خلاف بلا تفریق کارروائی کی جائے۔

ان کا کہنا تھا کہ یہ سوسائٹیاں نہ صرف ماحولیاتی تباہی کا باعث بن رہی ہیں بلکہ سیلاب کے دوران انسانی جانوں اور کھیتوں کو بھی شدید خطرات لاحق کرتی ہیں۔حافظ نعیم الرحمن نے کہا کہ جماعت اسلامی ایک منظم نظام کے تحت ریلیف سرگرمیاں جاری رکھے ہوئے ہے اور خواتین و یوتھ ونگ بھی متاثرین کی بحالی میں شریک ہیں۔

(جاری ہے)

انہوں نے حکومت کو تنقید کا نشانہ بناتے ہوئے کہا کہ ہر قدرتی آفت کے بعد اقدامات کرنے کے بجائے پہلے سے حکمت عملی اختیار کی جانی چاہیے تھی۔

اگر ڈیمز بروقت تعمیر ہو جاتے اور پیشگی وارننگ سسٹم مؤثر بنایا جاتا تو آج یہ حالات نہ ہوتے۔امیر جماعت اسلامی نے کہا کہ کالا باغ ڈیم کو ایک طرف رکھ دیا جائے مگر دیگر ڈیمز کی تعمیر اب ناگزیر ہے۔ پاکستان میں پانی کی دستیابی چند مہینوں میں 84 فیصد تک بڑھ جاتی ہے لیکن ذخیرہ نہ ہونے کے باعث ضائع ہو جاتی ہے، جبکہ باقی مہینوں میں قلت پیدا ہو جاتی ہے۔

انہوں نے کہا کہ حالیہ سیلاب نے چاول اور گندم کی فصلوں کو شدید نقصان پہنچایا ہے جس سے زرعی بحران اور آٹے کی قیمتوں میں اضافہ ہوا ہے۔ وزیر اعظم اور وزیر اعلیٰ کو تنقید کا نشانہ بناتے ہوئے ان کا کہنا تھا کہ اگر وہ سوشل میڈیا اور فوٹو سیشن پر وقت ضائع کرنے کے بجائے مہنگائی کنٹرول پر توجہ دیں تو عوام کو ریلیف مل سکتا ہے۔حافظ نعیم الرحمن نے مزید کہا کہ بعض نجی سوسائٹیاں میڈیا پر دعوے کرتی ہیں کہ متاثرین کو معاوضہ دیا جائے گا، مگر اصل سوال یہ ہے کہ ان کو این او سی کس نے دیا اور اس کا محاسبہ کون کرے گا۔