امریکی صدر نے اچانک بھارت سے متعلق اپنا رویہ نرم کر لیا

امریکا اور بھارت کے درمیان تجارتی رکاوٹیں دور کرنے کے لیے مذاکرات جاری ہیں، اپنے بہترین دوست وزیراعظم مودی سے آنے والے ہفتوں میں گفتگو کا منتظر ہوں، ڈونلڈ ٹرمپ کا پیغام

محمد علی بدھ 10 ستمبر 2025 19:54

واشنگٹن (اُردو پوائنٹ اخبارتازہ ترین۔ 10 ستمبر2025ء)امریکی صدر نے اچانک بھارت سے متعلق اپنا رویہ نرم کر لیا، بھارت کے ساتھ تجارتی مذاکرات کی کامیابی کا عندیہ دے دیا۔ تفصیلات کے مطابق مسلسل بھارت کیخلاف جارحانہ رویہ اختیار کرنے والے امریکی صدر ڈونلڈ ٹرمپ نے اب اچانک بھارت سے متعلق اپنے رویے کو تبدیل کر لیا ہے۔ بدھ کے روز امریکی صدر ڈونلڈ ٹرمپ کی جانب سے بھارت کیلئے اہم پیغام جاری کیا گیا۔

اپنے سوشل میڈیا پیغام میں امریکی صدر نے کہا کہ دونوں ممالک کے درمیان تجارتی رکاوٹیں دور کرنے کے لیے مذاکرات جاری ہیں۔ اپنے بہترین دوست وزیراعظم مودی سے آنے والے ہفتوں میں گفتگو کا منتظر ہوں، یقین ہے 2 عظیم ممالک کے لیے کامیاب نتیجے پر پہنچنا مشکل نہیں ہوگا۔ رمپ کے بیان کے بعد بھارتی وزیر اعظم نریندر مودی نے بھی سوشل میڈیا پر ردعمل دیتے ہوئے کہا کہ ،میں بھی صدرٹرمپ سے بات کرنےکا منتظر ہوں ، بھارت امریکا قریبی دوست اور فطری شراکت دار ہیں، یقین ہےبات چیت تجارتی شراکت داری کے لامحدود امکانات کی راہ ہموار کرے گی۔

(جاری ہے)

بھارتی وزیر اعظم نے کہا کہ امریکا بھارت گفت وشنید کو جلد مکمل کرنے کے لیے ہماری ٹیمیں کام کر رہی ہیں، دونوں ممالک کےعوام کےخوشحال اورروشن مستقبل کےلیےمل کرکام کریں گے۔ واضح رہے کہ حال ہی میں امریکی صدر نے بھارت پر 50 فیصد ٹیرف عائد کرنے کا اعلان کیا تھا۔