وزیر اعظم محمد شہباز شریف قطر کے ایک روزہ دورہ کےبعد وطن پہنچ گئے

جمعرات 11 ستمبر 2025 20:00

اسلام آباد (اُردو پوائنٹ اخبارتازہ ترین - اے پی پی۔ 11 ستمبر2025ء) وزیر اعظم محمد شہباز شریف قطر کے ایک روزہ دورہ کےبعد وطن پہنچ گئے۔ جمعرات کو وزیراعظم آفس کے میڈیا ونگ سے جاری بیان کے مطابق وزیر اعظم نے دوحہ میں امیر قطر شیخ تمیم بن حمد الثانی سے ملاقات کی۔ ملاقات میں نائب وزیر اعظم و وزیر خارجہ محمد اسحاق ڈار، وزیر دفاع خواجہ محمد آصف، وزیر اطلاعات و نشریات عطاء اللہ تارڑ اور معاون خصوصی طارق فاطمی بھی موجود تھے۔

(جاری ہے)

ملاقات میں وزیر اعظم نے دوحہ پر بلاجواز اسرائیلی جارحیت اور بین الاقوامی قوانین کے صریح منافی حملے کے تناظر میں امیر قطر اور قطرکے عوام سے یکجہتی کا اظہار کیا۔ وزیر اعظم نے قطر اور پاکستان کے مابین دیرینہ تاریخی برادرانہ تعلقات کا ذکر کیا جو مشترکہ مذہب اور اقدار پر مبنی ہیں۔ وزیراعظم نے کہا کہ پاکستان نے قطر کا ہمیشہ ہر مشکل وقت میں ساتھ دیا اور دیتا رہے گا۔ ملاقات میں خطہ کے مختلف ممالک پراسرائیل کے بلاجواز حملوں ،مسلسل جارحیت اورخطہ میں امن کے قیام کیلئے مشاورت کی گئی۔