پھل کاشتکاروں کا انتظامیہ کی عوام دشمن پالیسیوں کیخلاف احتجاجی مظاہرہ،ڈوڈہ میں پابندیوں کا نفاذ جاری، حریت کانفرنس کا نظربندوں کی حالت زار پر اظہار تشویش

سری نگر (اُردو پوائنٹ اخبارتازہ ترین - اے پی پی۔ 13 ستمبر2025ء) بھارت کے غیر قانونی زیر قبضہ جموںو کشمیر میں سینکڑوں پھل کاشتکاروں نے بی جے پی انتظامیہ کی عوام دشمن پالیسیوں کے خلاف سوپور میں ایک زبردست احتجاجی مظاہرہ کیا ۔ سرینگر جموں شاہراہ کی مسلسل بندش کے باعث پھل تاجروں کا کروڑ روپے کا نقصان ہواہے۔کشمیر میڈیا سروس کے مطابق مظاہرین کا کہنا تھا کہ پھلوں سے لدے ہزاروں ٹرک گزشتہ دوہفتوں سے زائد عرصے سے سرینگر جموں شاہراہ پر پھنسے ہوئے ہیں جسکی وجہ سے ان پر لدا ہوا پھل خراب ہو گیا ہے ۔

انہوں نے کہا کہ ایک اندازے کے مطابق کاشتکاروں کا 12سو کروڑ روپے کا نقصان ہوا ہے۔ مظاہرین نے کہا کہ انتظامیہ شاہراہ کی مکمل بحالی میں عدم دلچسپی کا مظاہرہ کر رہی ہے جس کی وجہ سے کاشتکاروں کا شدید نقصان ہو رہا ہے۔

(جاری ہے)

سوپور فروٹ منڈی ایسوسی ایشن کے صدر فیاض احمد ملک نے کہا کہ انتظامیہ کی عدم توجہی کے سبب مقبوضہ علاقے کے پھلوں کی صنعت تباہی کے دہانے پر ہے۔

انہوں نے کہا کہ اگر معاملے کی طرف فوری توجہ نہ دی تو وہ اپنے احتجاج میں تیزی لائیں گے۔جموں خطے کے ضلع ڈوڈہ میں رکن اسمبلی معراج ملک کی کالے قانون پبلک سیفٹی ایکٹ کے تحت گرفتاری کیخلاف مظاہروں کو روکنے کیلئے آج مسلسل پانچویں روز بھی سخت پابندیوں کا نفاذ جاری رہا۔ ضلع میں معمولات زندگی درہم برہم ہیں۔ انٹرنیٹ سروس اور تعلیمی ادارے بند ہیں جبکہ بڑی تعداد میں بھارتی فورسز اہلکارسڑکوں پر گشت کر رہے ہیں۔

پولیس نے مظاہروں میں حصہ لینے کی پاداش میں اب تک 80 سے زائد افراد گرفتار کیے ہیں جن میں کئی خواتین بھی شامل ہیں۔کل جماعتی حریت کانفرنس کے ترجمان ایڈووکیٹ عبدالرشید منہاس نے سرینگر میں جاری ایک بیان میں حریت رہنمائوں اور کارکنوں سمیت کشمیری نظر بندوں کی حالت زار پر شدید تشویش کا اظہار کرتے ہوئے کہا کہ ان لوگوں کو تنازعہ کشمیر کے حل کیلئے سیاسی جدوجہد کرنے پر سلاخوں کے پیچھے ڈال دیا گیا ہے۔

انہوں نے کہا کہ بی جے پی کی بھارتی حکومت کشمیریوں کے جذبہ آزادی کو بدترین ریاستی دہشت گردی کے ذریعے دبانے کی کوشش کر رہی ہے۔ ترجمان نے اقوام متحدہ کے سیکرٹری جنرل انتونیو گوتریس پر زور دیا ہے کہ وہ نظر بندوں کی رہائی اورتنازعہ کشمیرکے حل کیلئے اپنا کردار ادا کریں ۔مقبوضہ کشمیر ہائی کورٹ نے ضلع اسلام آباد کے رہائشی امتیاز احمد گنائی کی کالے قانون ”پبلک سیفٹی ایکٹ “ کے تحت نظر بندی کالعدم قرار دیتے ہوئے انتظامیہ کو انکی فوری رہائی کے احکامات دیے۔