پاکستان کے جمہوری سفر میں پیپلز پارٹی کی قربانیاں اور کوششیں ناقابلِ فراموش ہیں، شگفتہ نورین کاظمی

پیر 15 ستمبر 2025 15:07

مظفرآباد(اُردو پوائنٹ اخبارتازہ ترین - این این آئی۔ 15 ستمبر2025ء)نائب صدر وممبر آرگنائزنگ کمیٹی پاکستان پیپلزپارٹی خواتین ونگ آزاد جموں وکشمیر شگفتہ نورین کاظمی نے کہا ہے کہ جمہوریت ہی پاکستان کے عوام کو بااختیار بنانے اور مستقبل کی تشکیل میں ان کی آواز کو یقینی بنانے کا ذریعہ ہے،پاکستان کی ترقی کا واحد راستہ مضبوط جمہوریت ہے۔جمہوریت کے عالمی دن کے موقع پر اپنے خصوصی پیغام میں شگفتہ نورین کاظمی نے کہا ہے کہ قائداعظم محمد علی جناحؒ پاکستان میں پارلیمانی جمہوریت چاہتے تھے اور اسی وژن کے مطابق شہید ذوالفقار علی بھٹو نے 1973 کا آئین دے کر جمہوری نظام کو مستحکم کیا،شہید محترمہ بینظیر بھٹو نے بھی جمہوریت کو عوام کی آواز بنایا اور ہر طبقے کو نمائندگی فراہم کی۔

انہوں نے کہا ہے کہ پاکستان کے جمہوری سفر میں پیپلز پارٹی کی قربانیاں اور کوششیں ناقابلِ فراموش ہیں،پیپلز پارٹی نے جمہوری اصولوں،قانون کی حکمرانی اور سماجی انصاف کے فروغ میں کلیدی کردار ادا کیا ہے۔

(جاری ہے)

ان کا کہنا تھا کہ صدر آصف علی زرداری نے ''جمہوریت بہترین انتقام ہی'' کے اصول پر عمل کرتے ہوئے آمریت کے خلاف مزاحمت کی اور پارلیمان کو بااختیار بنایا، انہوں نے 18ویں ترمیم کے ذریعے صوبائی خودمختاری اور اختیارات کی نچلی سطح تک منتقلی کو یقینی بنایا۔

انہوں نے کہا ہے کہ چیئرمین پاکستان پیپلزپارٹی بلاول بھٹو زرداری نوجوان قیادت کی علامت ہیں جو جمہوریت، انسانی حقوق اور سیاسی رواداری کے لیے مسلسل آواز بلند کر رہے ہیں،ان کی قیادت میں پیپلز پارٹی ایک جمہوری، خوشحال اور ترقی یافتہ پاکستان کے لیے پرعزم ہے۔