پاکستان زیر التوا مقدمات کے بوجھ جیسے سنگین مسئلے کا شکار ہی: جسٹس میاں گل حسن

2022 سے اب تک ترکیہ نے 2ملین سے زائد مقدمات ثالثی سے نمٹائے، پاکستان کے پاس 200 ہیں ،خطاب

پیر 22 ستمبر 2025 02:25

اسلام آباد(اُردو پوائنٹ اخبارتازہ ترین - این این آئی۔ 22 ستمبر2025ء)سپریم کورٹ کے جج جسٹس میاں گل حسن اورنگزیب نے کہاہے کہ پاکستان زیرِ التوا مقدمات کے بوجھ جیسے سنگین مسئلے کا شکار ہے،مقدمات کو عدالت میں آنے سے قبل ہی ابتدائی مرحلے میں ثالث کے پاس بھیجا جا سکتا ہے۔

(جاری ہے)

اتوارکو6روزہ سول کمرشل ثالثی ٹریننگ پروگرام کی اختتامی تقریب سے خطاب کرتے ہوئے جسٹس میاں گل حسن اورنگزیب نے کہا کہ ثالثی کے 3اجزا ہیں، بین الاقوامی سطح کی ثالثی کا نفاذ ہونا چاہیے، ثالثی کے ذریعے مقدمات کے حل کی قراردار پنجاب اور بلوچستان نے منظور کی، امید ہے باقی صوبے بھی جلد ایسا کریں گے۔

انہوںنے کہاکہ 2022 سے اب تک ترکیہ نے 2ملین سے زائد مقدمات ثالثی سے نمٹائے، پاکستان کے پاس 200ثالث ہیں لیکن ان کو مقدمات بھیجے نہیں جاتے، ثالثی کے لیے دل اور دماغ میں تبدیلی لانا ناگزیر ہے۔انہوں نے کہا کہ مقدمات کے متبادل حل کی ٹریننگ مکمل کرنے پر شرکاء کو مبارکباد پیش کرتا ہوں، جو آپ نے سیکھا یہ انصاف کی فراہمی میں اپنا کردار ادا کرے گا۔