نائب وزیراعظم و وزیر خارجہ محمد اسحاق ڈار کی اقوام متحدہ میں فلسطین کے مسئلے کے پرامن حل اور دو ریاستی فارمولے پر عملدرآمد سے متعلق اعلیٰ سطحی عالمی کانفرنس میں شرکت

نیویارک (اُردو پوائنٹ اخبارتازہ ترین - اے پی پی۔ 23 ستمبر2025ء) نائب وزیراعظم و وزیر خارجہ محمد اسحاق ڈار نے یہاں اقوام متحدہ میں فلسطین کے مسئلے کے پرامن حل اور دو ریاستی فارمولے پر عملدرآمد سے متعلق اعلیٰ سطحی عالمی کانفرنس میں شرکت کی۔ یہ کانفرنس سعودی عرب اور فرانس کی مشترکہ صدارت میں منعقد ہوئی۔ منگل کو دفتر خارجہ سے جاری بیان کے مطابق اس اجلاس کی اہمیت اس وجہ سے بھی نمایاں رہی کہ متعدد ممالک نے ریاست فلسطین کو تسلیم کیا، جس سے فلسطینی عوام کے حقِ خودارادیت اور ریاست کے قیام پر بین الاقوامی اتفاقِ رائے کو مزید تقویت ملی،نائب وزیراعظم و وزیر خارجہ نے فرانس، برطانیہ، آسٹریلیا، کینیڈا، پرتگال اور دیگر ممالک کی جانب سے ریاست فلسطین کو تسلیم کرنے کا خیرمقدم کیا اور ان تمام ممالک پر زور دیا جو ابھی تک فلسطین کو تسلیم نہیں کر پائے کہ وہ بھی بین الاقوامی قانون کی پاسداری کرتے ہوئے ایسا قدم اٹھائیں۔

(جاری ہے)

پاکستان نے کانفرنس میں فعال کردار ادا کیا اور فلسطین کے مسئلے پر اپنی دیرینہ اور اصولی پالیسی کو برقرار رکھتے ہوئے "نیو یارک ڈیکلریشن" کے نام سے جاری حتمی اعلامیے کی توثیق کی۔ یہ اقدام پاکستان کے اس مستقل عزم کا عکاس ہے کہ مشرقِ وسطیٰ میں ایک منصفانہ اور دیرپا امن قائم ہو۔ پاکستان ان اولین ممالک میں شامل تھا جنہوں نے 1988 میں ریاست فلسطین کو تسلیم کیا اور ہمیشہ سے فلسطین کی اقوام متحدہ میں مکمل رکنیت کی حمایت کرتا آیا ہے۔

اس کانفرنس کا انعقاد ایک بروقت اور ناگزیر اقدام تھا جس کا مقصد عالمی وعدوں کو عملی شکل دینا اور امن کے قیام کے لیے نئی توانائی پیدا کرنا تھا۔ اس کے بعد مربوط اور مؤثر عالمی اقدامات ضروری ہیں تاکہ مشرقِ وسطیٰ میں طویل عرصے سے منتظر امن اور استحکام قائم کیا جا سکے۔پاکستان غزہ میں جاری اسرائیلی جارحیت کی شدید مذمت کرتا ہے اور فوری، غیر مشروط اور مستقل جنگ بندی کے مطالبے کے ساتھ ساتھ محصور اور غذائی قلت کی شکار فلسطینی آبادی کے لیے بلا روک ٹوک انسانی امداد کی فراہمی پر زور دیتاہے۔

نائب وزیر وزیراعظم و وزیر خارجہ کی اس کانفرنس میں شرکت نے فلسطینی عوام کے ساتھ پاکستان کی تاریخی اور غیر متزلزل یکجہتی کو ایک بار پھر اجاگر کیا ہے۔ پاکستان ہمیشہ ایک آزاد، خودمختار فلسطینی ریاست کے قیام کی حمایت کرتا آیا ہے جو 1967 سے پہلے کی سرحدوں کی بنیاد پر قائم ہو اور جس کا دارالحکومت القدس الشریف ہو، جو کہ اقوام متحدہ اور او آئی سی کی متعلقہ قراردادوں اور بین الاقوامی اصولوں کے مطابق ہے۔