Live Updates

قوم 27 ستمبر کے جلسے کیلئے گھروں سے نکلے : مسرت چیمہ

بدھ 24 ستمبر 2025 21:54

لاہور(اُردو پوائنٹ اخبارتازہ ترین - آن لائن۔ 24 ستمبر2025ء)پاکستان تحریک انصاف کی سینئر رہنما مسرت جمشید چیمہ نے کہا ہے کہ خوف و ہراس کی فضاء کے باوجود عوام 27ستمبر کے جلسے میں شرکت کیلئے باہر نکلیں گے،بانی پی ٹی آئی عمران خان ذ اتی مفادات کے لئے نہیں بلکہ قوم کی حقیقی آزادی کی جنگ لڑ رہے ہیں۔

(جاری ہے)

اپنے بیان میں مسرت جمشید چیمہ نے کہاکہ بانی پی ٹی آئی نے جیل سے اپنے پیغا م میں کہا ہے ساری قوم 27 ستمبر کے جلسے میں شرکت کے لئے گھروں سے نکلے،یہ جلسہ قوم کی حقیقی آزادی کے لیے ہے جس کے لئے ہمیں جدوجہد کرنی ہے۔

عمران خان اپنی ذات کے لئے نہیں بلکہ ملک و قوم کے مفادات کے لئے ڈٹ کر اور جرات سے کھڑے ہیں۔ ان کی اہلیہ بشری بی بی بھی ان کے شانہ بشانہ ہیں۔ مسرت جمشید چیمہ نے کہا کہ پاکستانی قوم لازوال جدوجہد پر عمران خان کی احسان مند ہے، ان شا اللہ ظلم اور جبر کی تاریک جلد ختم ہوگی اور ملک میں حقیقی آزادی کا سورج طلوع ہوگا۔