Live Updates

حکمران جماعتوں نے کراچی کو تباہی کے دھانے پر پہنچا دیا،علامہ مبشر حسن

جمعہ 26 ستمبر 2025 19:14

کراچی (اُردو پوائنٹ اخبارتازہ ترین - این این آئی۔ 26 ستمبر2025ء) مجلس وحدت مسلمین کے رہنما علامہ مبشر حسن نے کہا ہے کہ حکمران جماعتوں نے کراچی کو تباہی کے دھانے پر پہنچا دیا۔شہر قائد کی ابتر صورتحال مزید سنگین ہوتی جارہی ہے۔عوام پانی، بجلی،اشیائے خوردونوش سمیت بنیادی ضروریات زندگی کے حصول میں بدترین اذیت کا شکار ہیں۔ برسر اقتدار جماعتوں کو الزام تراشیوں سے فرصت نہیں۔

پانی، بجلی، گیس کی قلت،گراں فروشی،پارکنگ مافیہ،لینڈ مافیہ قبضہ گروپس کو روکنے والا کوئی نہیں۔شہر میں بڑھتے ہوئے جرائم نے ماضی کے سارے ریکارڈ توڑ دے آئے روز سینکڑوں شہری جانی و مالی نقصانات کا شکار ہو رہے ہیں۔ لیکن کسی کے کانوں پر جوں تک نہیں رینگتی،انہوں نے کہا کہ برسر اقتدار جماعتیں رسہ کشی کی بجائے شہر کی مخدوش صورتحال کو ٹھیک کرنے کیلئے عملی اقدامات کریں، میئر کراچی بمقابلہ وزیر صحت کا کھیل بند ہونا چاہئے،حکمران جماعتیں تین،تین دھائیوں سے شہر پر مسلط ہیں انفراسٹرکچر پر کربوں روپے خرچ ہوچکے ہیں مگر سندھ کے قدیمی شہر آج موئن جو دڑو کا منظر پیش کر رہا ہے۔

(جاری ہے)

انہوں نے کہا مقتدر جماعتیں عوام کو ٹیکہ لگارہی ہیں، حالیہ بارشوں میں شہر سیلابی منظرپیش کر رہا تھا،عوامی پیسوں سے بنائے گئے اربوں روپے کے پل ٹوٹنا ناقص منصوبہ بندی کا نتیجہ ہے اس کی ذمہ داری کس پر عائد ہوتی ہے۔دنیا بھر میں مشہور میگا سٹی کراچی کے انفراسٹرکچر درستگی کیلئے مستحکم پلاننگ کیوں نہیں کی جاتی۔ماحولیاتی تبدیلی کو مد نظر رکھتے ہوئے شہر کی تزئین و آرائش کی جائے۔عوام اتنے نادان نہیں کہ انہیں حالات کا درک نہ ہو۔ پیپلز پارٹی اور ایم کیو ایم دونوں الزامات کی سیاست ختم کر کے سہولیات فراہم کریں۔