Live Updates

پنجاب کے وسائل، خزانے اور پانی پر پہلے پنجاب کا حق ہے پھر کسی اور کا ہے

پیپلز پارٹی والے لسانیت صوبائیت کو ہوا دے رہے ہیں، اگر یہ لوگ میڈیا پر سیاست کرینگے تو انہیں جواب بھی میڈیا پر ملےگا، یہ سندھ میں جو کارنامے سرانجام دے رہے ہمیں معلوم ہے، وزیراطلاعات پنجاب عظمیٰ بخاری

ثنااللہ ناگرہ منگل 30 ستمبر 2025 18:50

پنجاب کے وسائل، خزانے اور پانی پر پہلے پنجاب کا حق ہے پھر کسی اور کا ..

لاہور (اُردو پوائنٹ اخبارتازہ ترین۔ 30 ستمبر 2025ء) وزیر اطلاعات و ثقافت پنجاب عظمیٰ بخاری نے پیپلز پارٹی کے رہنماؤں کے حالیہ بیانات کو غیر سنجیدہ اور بے بنیاد قرار دیتے ہوئے کہا کہ پنجاب کے وسائل، خزانے اور پانی پر سب سے پہلے پنجاب کے عوام کا حق ہے، اس کے بعد کسی اور کا۔ عظمیٰ بخاری نے کہا کہ پیپلز پارٹی کے رہنما پنجاب کے سیلاب پر سیاست کر رہے ہیں۔

کیا یہ مشورہ ان کو مودی نے دیا ہے؟ ان کا کہنا تھا کہ صوبائی اور لسانی سیاست کو ہوا دینے کی کوشش پیپلز پارٹی خود کررہی ہے، وہ بھی ایک منظم مہم کے تحت۔وزیر اطلاعات نے مزید کہا کہ اگر آپ کو سوال و جواب کرنا ہے تو اسمبلی کا فورم موجود ہے۔ اگر خود حاضر نہیں ہوسکتے تو آپ کے ارکان تو وہاں موجود ہیں۔ مگر جب آپ میڈیا پر آکر پنجاب کے سیلاب جیسے حساس مسئلے پر اپنی مردہ سیاست کو زندہ کریں گے تو جواب بھی میڈیا پر ہی دیا جائے گا۔

(جاری ہے)

انہوں نے کہا کہ پیپلز پارٹی کو پنجاب میں مریم نواز کی کامیابی اور عوامی خدمت سے تکلیف ہورہی ہے، کیونکہ اب سندھ کے عوام بھی مریم نواز کو یاد کرتے ہیں۔ ''مریم نواز پنجاب کی وزیر اعلیٰ ہیں اور وہ پنجاب کے عوام کے حق میں آواز بلند کرتی رہیں گی۔انہوں نے پیپلز پارٹی پر تنقید کرتے ہوئے کہا کہ سندھ گزشتہ دو دہائیوں سے ایک ہی خاندان کے قبضے میں ہے۔

وہاں عوام کی خدمت کے کون سے کارنامے سرانجام دیے گئے؟ یہ سب بھی سب کو معلوم ہے۔عظمیٰ بخاری نے کہا کہ پچھلے تین ہفتوں سے پیپلز پارٹی باجماعت پنجاب کے سیلاب پر سیاست کر رہی ہے۔ اگر آج بھی آپ کے میچور رہنماؤں نے آپ کو پنجاب پر سیاست سے نہیں روکا تو یہ سیاسی نابالغی اور نالائقی ہی ہے کہ آفات پر سیاست کی جائے۔ مزید برآں وزیر اطلاعات پنجاب عظمیٰ بخاری نے ایک بار پھر پیپلزپارٹی کو تنقید کا نشانہ بنایا ہے۔

عظمیٰ بخاری نے پیپلزپارٹی کی رہنما شازیہ مری کے بیان پر ردعمل میں کہا کہ عقل کُل بننے کی کوشش نہ کریں، جہاں آپ کا مینڈیٹ نہیں وہاں ڈیڑھ گز کی مسجد بنانے کی کوشش نہ کریں۔انہوں نے کہا کہ بلاول بھٹو دودھ اور شہد کی جو نہریں بہاناچاہتے وہ سندھ میں بہالیں جہاں ان کے پاس مینڈیٹ ہے، پنجاب نے مریم نواز کو مینڈیٹ دیا ہے، انہیں معلوم ہے کہ لوگوں کے مسائل کیسے حل کرنے ہیں اور وہ کربھی رہی ہیں۔عظمیٰ بخاری کا کہنا تھا کہ پنجاب حکومت بی آئی ایس پی کے تحت 12 ہزارروپے تقسیم نہیں کرسکتی، ایسے لالی پاپ آپ سندھ کے عوام کو دیں۔