وزیراعظم یوتھ پروگرام کے تحت نوجوانوں کیلئے روزگار کے مواقع فراہم کر رہے ہیں، سید ذیشان نقوی

بیرونِ ملک ملازمت کے خواہشمند نوجوانوں کو ویزہ اور سفری اخراجات کیلئے دس لاکھ روپے تک کے قرضے فراہم کیے جائیں گے‘خطاب

بدھ 1 اکتوبر 2025 12:55

اسلام آباد(اُردو پوائنٹ اخبارتازہ ترین - این این آئی۔ 01 اکتوبر2025ء)وزیراعظم یوتھ پروگرام کے فوکل پرسن اور اسلام آباد کے سابق ڈپٹی میئر سید ذیشان علی نقوی نے کہا ہے کہ وزیراعظم یوتھ پروگرام کے تحت نوجوانوں کے لیے قرضے، لیپ ٹاپ اور روزگار کے مواقع فراہم کر رہے ہیں۔ڈیلس میں پاکستانی نژاد امریکیوں کی تنظیم ’اسٹینڈ وِد پاکستان‘ کے عشائیے سے خطاب کرتے ہوئے سید ذیشان علی نقوی نے کہا کہ پاکستان کی 70 فیصد آبادی نوجوانوں پر مشتمل ہے، یہی وجہ ہے کہ وزیراعظم شہباز شریف ان تمام منصوبوں کو ذاتی طور پر مانیٹر کر رہے ہیں تاکہ نوجوان ملک کی ترقی میں براہِ راست کردار ادا کرسکیں۔

ذیشان نقوی نے کہا کہ یوتھ پروگرام کے تحت نوجوانوں کو تین سے چھ لاکھ روپے کے بلاسود قرضے کاروبار کے آغاز کے لیے دیے جارہے ہیں جبکہ بیرونِ ملک ملازمت کے خواہشمند نوجوانوں کو ویزہ اور سفری اخراجات کے لیے دس لاکھ روپے تک کے قرضے فراہم کیے جائیں گے۔

(جاری ہے)

اس مقصد کے لیے رواں مالی سال میں پچھتر ارب روپے مختص کیے گئے ہیں۔ان کا کہنا تھا کہ اب تک ایک سو چھیاسی ارب روپے سے زائد کے قرضے جاری ہوچکے ہیں اور لاکھوں نوجوانوں کے لیے بیرونِ ملک ملازمتوں کی راہیں ہموار کی گئی ہیں جبکہ ڈیجیٹل یوتھ ہب کے ذریعے ملک بھر میں نوکریاں اور ٹریننگ فراہم کی جارہی ہیں۔

انہوں نے بتایا کہ اعلیٰ تعلیم کے فروغ کے لیے لیپ ٹاپ اسکیم دوبارہ بحال کر دی گئی ہے۔ اکتوبر تک ایک لاکھ لیپ ٹاپ تقسیم کیے جائیں گے۔ جامعات کی گرانٹس اور اسکالرشپس بھی بحال کردی گئی ہیں اور آئندہ بجٹ میں تعلیم کے لیے مزید اضافہ متوقع ہے۔ذیشان نقوی نے نوجوانوں کی کھیلوں اور ثقافتی سرگرمیوں کا ذکر کرتے ہوئے کہا کہ ارشد ندیم سمیت قومی سطح کے کھلاڑی یوتھ پروگرام کے تحت تربیت پا رہے ہیں، نیزہ بازی اور دیگر روایتی کھیل بھی اس منصوبے کا حصہ ہیں جنہیں عالمی سطح پر اجاگر کرنے کے لیے اسلام آباد میں غیرملکی سفارتکاروں کی موجودگی میں ایونٹس منعقد کیے جاتے ہیں۔

انہوں نے کہا کہ پاکستان نے پہلی بار کامن ویلتھ یوتھ الائنس سیکرٹریٹ اور یوتھ منسٹرز ٹاسک فورس کی چیئرمین شپ حاصل کی ہے، جس سے چھپن ممالک کے ساتھ تعاون بڑھے گا۔ جلد ہی ایک یوتھ میلہ بھی منعقد کیا جائے گا جس میں تربیت، ملازمت اور اسٹارٹ اپ مواقع فراہم کیے جائیں گے۔