حکومت معاشی ترقی میں نجی شعبے کو قائدانہ کردار دینے کیلئے سازگار ماحول فراہم کرنے میں پرعزم ہے،پائیدار ترقی و نمو کیلئے پاکستان کی عالمی مسابقت، نجی شعبے کی فعالیت اور وفاق و صوبوں کے مابین قریبی ہم آہنگی ضروری ہے، وفاقی وزیر خزانہ محمد اورنگزیب

اسلام آباد (اُردو پوائنٹ اخبارتازہ ترین - اے پی پی۔ 02 اکتوبر2025ء) وفاقی وزیر خزانہ و محصولات سینیٹر محمد اورنگزیب نے کہاہے کہ حکومت ملک کی معاشی ترقی میں نجی شعبے کو قائدانہ کردار دینے کے لیے سازگار ماحول فراہم کرنے میں پرعزم ہے، پاکستان رواں سال کے اختتام سے قبل پہلا پانڈا بانڈ جاری کرے گا،پائیدار ترقی و نمو کیلئے پاکستان کی عالمی مسابقت، نجی شعبے کی فعالیت اور وفاق و صوبوں کے مابین قریبی ہم آہنگی ضروری ہے۔

انہوں نے ان خیالات کااظہار جمعرات کو پشاور کے سرینا ہوٹل میں منعقدہ پاکستان بزنس سمٹ سے اپنے کلیدی خطاب میں کیا۔ یہ اجلاس گورنر خیبرپختونخوا کی سرپرستی میں منعقد ہوا، اس میں پالیسی سازوں، بزنس لیڈرز اور کارپوریٹ ایگزیکٹوز نے پاکستان کی معیشت، جدت اور عالمی مسابقت پر تبادلہ خیال کیا۔

(جاری ہے)

ایک روزہ یہ تقریب نٹ شیل گروپ اور البرکہ بینک (پاکستان) لمیٹڈ نے مشترکہ طور پر منعقد کی جبکہ او آئی سی سی آئی سٹریٹجک پارٹنر کے طور پر شامل رہا۔

وفاقی وزیر خزانہ نے اعلیٰ سطح کے سمٹ کے انعقاد پر منتظمین کو سراہا اور اس عزم کو دہرایا کہ حکومت پاکستان کی معاشی ترقی میں نجی شعبے کو قائدانہ کردار دینے کے لیے سازگار ماحول فراہم کرنے میں پرعزم ہے۔ انہوں نے کہا کہ حکومت کا کردارکلی معیشت کے استحکام کو یقینی بنانا، ڈھانچہ جاتی اصلاحات لانا اور سرمایہ کاری و کاروبار کے لیے موزوں و سازگار ماحول فراہم کرنا ہے۔

ملک کی معاشی پیش رفت کا ذکر کرتے ہوئے وزیرخزانہ نے بتایا کہ پالیسی ریٹ میں کمی کے باعث فنانسنگ کی لاگت میں نمایاں کمی آئی ہے، زرمبادلہ کے ذخائر تقریباً تین ماہ کی درآمدات کے لیے کافی ہیں اور ایکسچینج ریٹ میں استحکام پیدا ہوا ہے۔ ان عوامل نے سرمایہ کاروں کے اعتماد کو مضبوط اور منافع و ڈیویڈنڈ کی ترسیل کو آسان بنایا ہے۔ وزیر خزانہ نے بتایا کہ ترسیلات زر میں بھی خاطر خواہ اضافہ ہوا ہے جو گزشتہ سال 38 ارب ڈالر تک پہنچیں اور رواں مالی سال میں 41 سے 43 ارب ڈالر تک پہنچنے کی توقع ہے۔

انہوں نے اس بات پر بھی روشنی ڈالی کہ پاکستان نے ستمبر میں 50 کروڑ ڈالر یوروبانڈ کی ادائیگی بغیر کسی مارکیٹ میں خلل ڈالے کامیابی سے کی اور اپریل 2026ء میں 1.3 ارب ڈالر کی آئندہ ادائیگی کے لیے بھی بہتر پوزیشن میں ہے۔ڈھانچہ جاتی اصلاحات کاذکرکرتے ہوئے سینیٹر اورنگزیب نے جامع ٹیکس اصلاحات کے نفاذ کے حکومتی عزم کو دہرایا اورکہا کہ اس پالیسی کے تحت ٹیکس پالیسی کو ٹیکس انتظامیہ سے علیحدہ کیا جا رہا ہے تاکہ سرمایہ کاروں کا اعتماد بحال کیا جا سکے۔

انہوں نے سرکاری اداروں میں اصلاحات، نجکاری کی کوششوں اور توانائی کی قیمتوں کو ایجنڈے کے اہم اجزاء قرار دیا۔ وزیر خزانہ نے پاکستان کی برآمدات پر مبنی ترقیاتی حکمت عملی، خام مال اور انٹرمیڈیٹ گڈز پر ڈیوٹیز کم کرنے کے لیے ٹیرف اصلاحات اور غیر ملکی براہ راست سرمایہ کاری کو راغب کرنے کے اقدامات پر بھی بات کی۔ انہوں نے بیجنگ، ریاض، واشنگٹن اور نیویارک میں حالیہ روابط کو سرمایہ کاروں کے نئے اعتماد کی علامت قرار دیا اور بتایا کہ چینی کمپنیوں کے ساتھ 24 مشترکہ منصوبوں کے معاہدے طے پائے ہیں۔

انہوں نے مزید اعلان کیا کہ پاکستان رواں سال کے اختتام سے قبل پہلا پانڈا بانڈ جاری کرے گا جس کے ذریعے چین کی بڑی کیپٹل مارکیٹس تک رسائی حاصل ہو گی۔انہوں نے زور دیا کہ پائیدار ترقی ونمو کیلئے عالمی مسابقت، نجی شعبے کی فعالیت اور وفاق و صوبوں کے مابین قریبی ہم آہنگی ضروری ہے۔ انہوں نے 4.3 ٹریلین روپے کے قومی ترقیاتی بجٹ کے موثر استعمال پر زور دیا تاکہ بنیادی ڈھانچے، صحت اور تعلیم میں بہتری لائی جا سکے۔

طویل المدتی چیلنجز کا ذکر کرتے ہوئے وزیر خزانہ نے ماحولیاتی تبدیلی اور آبادی میں اضافے کو پاکستان کے وجودی مسائل قرار دیا۔ انہوں نے بچوں میں غذائی قلت، سیکھنے کی کمی اور ماحولیاتی لچک جیسے مسائل کو فوری توجہ کا متقاضی قرار دیا کیونکہ یہ براہِ راست پاکستان کی مستقبل کی پیداواری صلاحیت اور قیادت پر اثر انداز ہوتے ہیں۔وزیرخزانہ نے ایک بار پھر حکومت کے عزم کو دہرایا کہ پاکستان کو پائیدار معاشی بحالی، عالمی مسابقت اور لچک کی راہ پر گامزن کیا جائے گا اور اصلاحات و ترقی کے ثمرات عوام تک براہ راست پہنچائے جائیں گے۔