سعودی کاروبار وفد کا سندھ آنا باعثِ فخر ہے، گورنر ہاؤس کے دروازے سرمایہ کاروں کے لیے ہمیشہ کھلے ہیں، گورنر سندھ

جمعرات 9 اکتوبر 2025 21:10

کراچی (اُردو پوائنٹ اخبارتازہ ترین - اے پی پی۔ 09 اکتوبر2025ء) گورنر سندھ کامران خان ٹیسوری نے کہا ہے کہ سعودی سرمایہ کاروں اور پاکستانی بزنس مین کے درمیان تین معاہدوں پر اتفاق ہوا ہے۔گورنرہائوس سے جاری اعلامیہ کے مطابق یہ بات انہوں نے شہزادہ منصور بن محمد آل سعود اور ان کے ہمراہ آئے ہوئے سعودی سرمایہ کاروں کے وفد سے گورنر ہاؤس کراچی میں ملاقات کے موقع پر کہی۔

قبل ازیں شہزادہ منصور بن محمد آل سعود کے گورنر ہاوس پہنچنےپر گورنر سندھ کامران خان ٹیسوری نے پرتپاک استقبال کیا۔ وفد میں سعودی عرب کے سفیر نواف سعید المالکی، قونصل جنرل محمد عبداللہ السبیعی اور دیگر معزز شخصیات شامل تھیں۔ گورنر ہاؤس میں عسکری بینڈ کی سلامی اور پاک۔سعودی پرچم کشائی کی تقریب نے اس ملاقات کو یادگار بنا دیا۔

(جاری ہے)

اس موقع پر گورنر سندھ نے پاکستانی تاجروں کے ہمراہ سعودی وفد سے ملاقات کی، ملاقات میں توانائی، آئی ٹی، زراعت، تعمیرات اور دیگر شعبوں میں باہمی تعاون پر گفتگو ہوئی۔

گورنر سندھ نے اس دورے کو تجارتی و سرمایہ کاری تعلقات کے فروغ کا سنگِ میل قرار دیتے ہوئے کہا کہ سعودی بزنس وفد کا سندھ آنا باعثِ فخر ہےاور گورنر ہاؤس کے دروازے سرمایہ کاروں کے لیے ہمیشہ کھلے ہیں۔گورنر سندھ نے شاہ سلمان بن عبدالعزیز کی صحت کے لیے نیک تمناؤں کا اظہار کرتے ہوئے ولی عہد محمد بن سلمان کے وژن اور اصلاحاتی اقدامات کو خراجِ تحسین پیش کیا۔ انہوں نے کہا کہ پاک–سعودی تعلقات باہمی اعتماد، مذہبی اور ثقافتی رشتوں سے مضبوط ہیں۔سعودی عرب نے ہر مشکل وقت میں پاکستان کا ساتھ دیا ہے، اور ہمارا تعلق جسمانی نہیں بلکہ روحانی ہے ۔گورنر سندھ نے سعودی سفیر کی خدمات پر شکریہ ادا کرتے ہوئے اس ملاقات کو پاک۔سعودی دوستی کی نئی جہت قرار دیا