ْلاہور چیمبر کا بھارت نوازی دہشتگردی کیخلاف پاک افواج کے بروقت ،مؤثر ردعمل کو خراج تحسین

لاہور (اُردو پوائنٹ اخبارتازہ ترین - این این آئی۔ 13 اکتوبر2025ء) لاہور چیمبر آف کامرس اینڈ انڈسٹری نے بھارت کی پشت پناہی میں ہونے والی دہشت گردی اور افغانستان میں قائم دہشت گردوں کے محفوظ ٹھکانوں کے خلاف پاک افواج کی جانب سے کیے گئے بروقت، مؤثر اور انتہائی درست آپریشن کو زبردست خراج تحسین پیش کیا ہے۔لاہور چیمبر کے صدر فہیم الرحمن سہگل، سینئر نائب صدر تنویر احمد شیخ اور نائب صدر خرم لودھی نے اپنے بیان میں کہا کہ پاک فوج نے غیر معمولی حکمت اور پیشہ ورانہ صلاحیت کا مظاہرہ کرتے ہوئے دہشت گردوں کے ٹھکانوں کو نشانہ بنایا اور ایک بھی عام شہری کو نقصان نہیں پہنچنے دیا ۔

لاہور چیمبر کے عہدیداران نے کہا کہ پاک فوج کی یہ کارروائی پاکستان کی خودمختاری اور سلامتی کے تحفظ کے لیے ایک واضح پیغام ہے کہ پاکستان اپنی سرزمین یا عوام کے خلاف کسی بھی قسم کی جارحیت برداشت نہیں کرے گا۔

(جاری ہے)

انہوں نے بھارت کی جانب سے دہشت گردی کی پشت پناہی اور افغان حکومت کے منفی رویے پر گہری تشویش کا اظہار کرتے ہوئے کہا کہ پاکستان نے سوویت جنگ کے بعد 40 لاکھ سے زائد افغان مہاجرین کو پناہ دی، جنہیں یہاں روزگار، تعلیم اور کاروبار کے مواقع فراہم کیے گئے۔

لیکن افسوس کہ آج وہی ملک پاکستان کے خلاف دہشت گردی کو فروغ دے رہا ہے ۔ فہیم الرحمن سہگل، تنویر احمد شیخ اور خرم لودھی نے کہا کہ افغانستان کا یہ رویہ انسانیت اور اسلامی اخوت کے اصولوں سے انحراف ہے۔ پاکستان نے دہشت گردی کے خلاف جنگ میں بے شمار جانی و مالی قربانیاں دیں، لیکن بھارت پاکستان میں دہشت گردی کے لیے مسلسل افغانستان کی سرزمین استعمال کررہا ہے جو قابل برداشت نہیں۔

لاہور چیمبر کے رہنماؤں نے کہا کہ پاک فوج کی جانب سے افغانستان میں دہشت گردوں کے ٹھکانوں پر کی گئی کارروائی نہایت جرات مندانہ ، بروقت اور مؤثر تھی جس نے دشمن کو یہ واضح پیغام دیا کہ پاکستان اپنی خودمختاری پر کوئی سمجھوتہ نہیں کرے گا۔انہوں نے کہا کہ پاکستان امن پسند ملک ہے مگر اگر اس کی سلامتی اور علاقائی سالمیت کو خطرہ لاحق ہوا تو قوم اور فوج مل کر بھرپور طاقت سے جواب دیں گے۔

پاکستان کی صبر و تحمل کو کمزوری نہ سمجھا جائے۔لاہور چیمبر کے عہدیداروں نے کہا کہ تاجر، صنعتکار اور کاروباری طبقہ امن و استحکام کے لیے پاک فوج کے ساتھ کھڑا ہے، کیونکہ سرمایہ کاری، برآمدات اور معاشی ترقی صرف پرامن ماحول میں ممکن ہے۔انہوں نے اقوام متحدہ، او آئی سی اور عالمی طاقتوں سے مطالبہ کیا کہ وہ افغانستان کے غیر ذمہ دارانہ رویے کا سنجیدگی سے نوٹس لیں اور اسے اپنی سرزمین پاکستان مخالف دہشت گردی کے لیے استعمال ہونے سے روکیں۔

انہوں نے کہا کہ عالمی برادری کی خاموشی دہشت گرد عناصر کو مزید شہ دے رہی ہے، جس کے خطرناک نتائج برآمد ہوسکتے ہیں۔لاہور چیمبر کے رہنماؤں نے کہا کہ پاکستان نے دہشت گردی کے خلاف جنگ میں سب سے زیادہ قربانیاں دی ہیں ظ لاکھوں جانوں کا نذرانہ اور اربوں ڈالر کا معاشی نقصان برداشت کیا ظ لیکن پھر بھی پاکستان آج بھی علاقائی امن کے قیام کی فرنٹ لائن پر موجود ہے۔انہوں نے کہا کہ پوری قوم اور تاجر برادری پاک افواج کے ساتھ کھڑی ہے۔ ہم ایک ہیں، ایک پرچم تلے متحد ہیں، اور دشمن کبھی پاکستان کے عزم، اتحاد یا طاقت کو کمزور نہیں کر سکتا۔