Live Updates

26 نومبر احتجاج کیس؛ تھانہ صادق آباد میں درج مقدمہ میں علیمہ خان و دیگر ملزمان پر فردِ جرم عائد

راولپنڈی کی انسداد دہشت گردی عدالت کی طرف سے آئندہ سماعت پر استغاثہ کے 5 گواہان کو بھی طلب کرلیا گیا

ساجد علی بدھ 15 اکتوبر 2025 12:18

26 نومبر احتجاج کیس؛ تھانہ صادق آباد میں درج مقدمہ میں علیمہ خان و دیگر ..

راولپنڈی ( اُردو پوائنٹ اخبارتازہ ترین۔ 15 اکتوبر2025ء ) عدالت نے 26 نومبر احتجاج کیس میں تھانہ صادق آباد میں درج مقدمہ میں پاکستان تحریک انصاف کے پیٹرن انچیف عمران خان کی ہمشیرہ علیمہ خان و دیگر ملزمان پر فردِ جرم عائد کردی۔ تفصیلات کے مطابق راولپنڈی میں 26 نومبر احتجاج کیس میں تھانہ صادق آباد میں درج مقدمہ کی سماعت انسداد دہشت گردی عدالت میں ہوئی جہاں عدالت نے علیمہ خان سمیت 10 ملزمان پر فرد جرم عائد کردی، عدالت کی طرف سے آئندہ سماعت پر استغاثہ کے 5 گواہان کو بھی طلب کرلیا گیا۔

کچہری میں میڈیا سے گفتگو کرتے ہوئے علیمہ خان نے کہا کہ آج اگر عمران خان کا پیغام پہنچانے پر میں ملزم ہوں تو پھر کل پوری قوم ملزم بنے گی کیوں کہ کل جس کسی کی بات پسند نہیں آئے گی اس کے خلاف مقدمہ بنا دیا جائے گا، بتایا جائے میڈیا ٹاک سے کون سی دہشت گردی نکلتی ہے اور یہی آئینی قانونی نکتہ ہم نے عدالت چیلنج کیا ہے۔

(جاری ہے)

ان کا کہنا ہے کہ مجھ پر الزام ہنگامے کا نہیں بلکہ عمران خان کا پیغام پہنچانے کا ہے، میں نے 10 سے 15 صحافیوں اور یوٹیوبرز کو عمران خان کا پیغام پہنچایا، میڈیا نے پوری قوم تک پہنچا دیا پھر تو میڈیا بھی میرے ساتھ ملزم ہوگیا، پھر میڈیا کو بھی میرے ساتھ مقدمے میں شامل کرنا چاہیئے، ہم پر 60 سے 70 کیسز ہیں، کبھی پنڈی تو کبھی اسلام آباد سے وارنٹ نکال دیئے جاتے ہیں۔

سابق وزیراعظم کی ہمشیرہ کہتی ہیں کہ یہ ظلم اور خوف کی فضا ختم کرنا ہوگی، ہم ڈرنے والے نہیں، ہماری ترجیح عمران خان اور ان کے کیسز ہیں، ہم جیل میں ملاقات کرنے ٹرائل پر جاتے ہیں اور وارنٹ نکال دیئے جاتے ہیں، یہ ظلم کی فضاء ہم عدالتوں میں چیلنج کرکے ختم کروائیں گے کیوں کہ پاکستان کا آئین صرف مجھے ہی نہیں بلکہ ہر پاکستانی کو اظہار رائے کی آزادی دیتا ہے۔