Live Updates

چوہدری انوارالحق نے افغان وزیر خارجہ کی جانب سے دہلی میں بیٹھ کر مسئلہ کشمیر پر بھارت کی ہمنوائی مسترد کردی

جمعرات 16 اکتوبر 2025 22:59

مظفر آباد (اُردو پوائنٹ اخبارتازہ ترین - این این آئی۔ 16 اکتوبر2025ء) آزادجموں و کشمیر کے وزیراعظم چوہدری انوارالحق نے افغانستان کے وزیر خارجہ کی جانب سے دہلی میں بیٹھ کر مسئلہ کشمیر پر بھارت کی ہمنوائی کو سختی سے مسترد کر دیا ہے۔اپنے خصوصی بیان میں وزیراعظم نے کہا کہ مسئلہ کشمیر اقوام متحدہ میں ایک حل طلب مسئلہ ہے بھارت جموں و کشمیر پر اپنے جھوٹے بیانیے کی ترویج میں سرگرم عمل ہے مگر دنیا اس کے جھوٹ کو تسلیم نہیں کرتی۔

(جاری ہے)

انہوں نے کہا کہ افغانستان کے وزیر خارجہ تاریخ سے نابلد ہیں اور وہ حقائق سے آنکھیں چرا رہے ہیں،بھارت نے مقبوضہ کشمیر پر فوجی قبضہ کر رکھا ہے مگر کشمیری عوام بھارت کے فوجی قبضے کو تسلیم نہیں کرتے اور ہر عالمی فورم پر بھارت کے فوجی قبضے کے خلاف سرگرم عمل رہتے ہیں۔انہوں نے کہا کہ کشمیری عوام نے قیام پاکستان سے قبل ہی 19 جولائی 1947 کو خود کو الحاق پاکستان کی قرارداد کی روشنی میں پاکستان کے ساتھ وابستہ کر لیا تھا اور وہ یہ منزل حاصل کرنے کیلیے مسلسل جان و مال کی قربانیاں دے رہے ہیں۔انہوں نے کہا کہ اقوام متحدہ کی سلامتی کونسل کی قراردادوں کے مطابق کشمیری عوام کو ان کا حق خودارادیت ملنا ہے تاکہ وہ اپنے مستقبل کا فیصلہ کر سکیں۔