Live Updates

آزادجموں و کشمیر کے وزیراعظم نے افغانستان کے وزیر خارجہ کی جانب سے دہلی میں بیٹھ کر مسئلہ کشمیر پر بھارت کی ہمنوائی کو مسترد کر دیا

جمعرات 16 اکتوبر 2025 22:23

مظفر آباد (اُردو پوائنٹ اخبارتازہ ترین - اے پی پی۔ 16 اکتوبر2025ء) آزادجموں و کشمیر کے وزیراعظم چوہدری انوارالحق نے افغانستان کے وزیر خارجہ کی جانب سے دہلی میں بیٹھ کر مسئلہ کشمیر پر بھارت کی ہمنوائی کو سختی سے مسترد کر دیا ہے ۔اپنے خصوصی بیان میں وزیراعظم نے کہا کہ مسئلہ کشمیر اقوام متحدہ میں ایک حل طلب مسئلہ ہے، بھارت جموں و کشمیر پر اپنے جھوٹے بیانیے کی ترویج میں سرگرم عمل ہے مگر دنیا اس کے جھوٹ کو تسلیم نہیں کرتی ۔

(جاری ہے)

انہوں نے کہا کہ افغانستان کے وزیر خارجہ تاریخ سے نابلد ہیں اور وہ حقائق سے آنکھیں چرا رہے ہیں ،بھارت نے مقبوضہ کشمیر پر فوجی قبضہ کر رکھا ہے مگر کشمیری عوام بھارت کے فوجی قبضے کو تسلیم نہیں کرتی اور ہر عالمی فورم پر بھارت کے فوجی قبضے کے خلاف سرگرم عمل رہتی ہے۔انہوں نے کہا کہ کشمیری عوام نے قیام پاکستان سے قبل ہی 19 جولائی 1947 کو خود کو الحاق پاکستان کی قرارداد کی روشنی میں پاکستان کے ساتھ وابستہ کر لیا تھا اور وہ یہ منزل حاصل کرنے کےلئے مسلسل جان و مال کی قربانیاں دے رہی ہے۔انہوں نے کہا کہ اقوام متحدہ کی سلامتی کونسل کی قراردادوں کے مطابق کشمیری عوام کو ان کا حق خودارادیت ملنا ہے تاکہ وہ اپنے مستقبل کا فیصلہ کر سکیں۔