وفاقی حکومت کے تحت جاری ترقیاتی منصوبوں کی بروقت تکمیل ہماری ترجیحات میں شامل ہے، وزیراعظم محمد شہباز شریف

جمعرات 16 اکتوبر 2025 20:20

اسلام آباد (اُردو پوائنٹ اخبارتازہ ترین - اے پی پی۔ 16 اکتوبر2025ء) وزیراعظم محمد شہباز شریف نے کہا ہے کہ وفاقی حکومت کے تحت جاری ترقیاتی منصوبوں کی بروقت تکمیل ہماری ترجیحات میں شامل ہے۔ ان خیالات کا اظہار انہوں نے کنوینئر متحدہ قومی موومنٹ وفاقی وزیر تعلیم و فنی تربیت ڈاکٹر خالد مقبول صدیقی کی قیادت میں ملاقات کرنے والے وفد سے گفتگو کرتے ہوئے کیا۔

(جاری ہے)

وزیراعظم آفس کے میڈیا ونگ سے جمعرات کو جاری بیان کے مطابق وفد میں گورنر سندھ کامران خان ٹیسوری، اراکین قومی اسمبلی ڈاکٹر محمد فاروق ستار ،امین الحق اور جاوید حنیف شامل تھے۔وزیراعظم نے کہا کہ وفاقی حکومت کے تحت جاری ترقیاتی منصوبوں کی بروقت تکمیل ہماری ترجیحات میں شامل ہے۔وفد نے غزہ امن معاہدے کے حوالے سے پاکستان کی کاوشوں پر وزیراعظم کو خراج تحسین پیش کیا۔

اس موقع پر ملک کی مجموعی و سیاسی صورتحال پر تبادلہ خیال کیا گیا۔ ملاقات میں نائب وزیراعظم و وزیر خارجہ اسحاق ڈار ،وفاقی وزیر منصوبہ بندی احسن اقبال ، وفاقی وزیر ہاؤسنگ ریاض حسین پیر زادہ، وفاقی وزیر پبلک افیئرز یونٹ رانا مبشر اقبال اور مشیر وزیراعظم برائے سیاسی امور رانا ثناء اللہ بھی موجود تھے۔