وزیراعلیٰ خیبر پختونخوا اجلاس میں بیٹھ کر بات چیت کرنے پر یقین نہیں رکھتے، ٹی ایل پی اور پی ٹی آئی کی احتجاج کی کال عوام نے یکسر مسترد کر دی ہے، بے مقصد احتجاجی کالوں کا یہی نتیجہ نکلتا ہے، عطاء اللہ تارڑ

اسلام آباد (اُردو پوائنٹ اخبارتازہ ترین - اے پی پی۔ 17 اکتوبر2025ء) وفاقی وزیر اطلاعات و نشریات عطاء اللہ تارڑ نے کہا ہے کہ عوام نے ٹی ایل پی اور تحریک انصاف کی احتجاج کی کال یکسر مسترد کر دی ہے، بے مقصد احتجاج کی کالوں کا یہی نتیجہ نکلتا ہے، ملک بھر میں کاروبار زندگی رواں دواں ہے، وزیراعلیٰ خیبر پختونخوا اجلاس میں بیٹھ کر بات چیت کرنے پر یقین نہیں رکھتے، وزیراعظم کی زیر صدارت خیبر پختونخوا کے امن و امان سے متعلق اجلاس میں وزیراعلیٰ کی موجودگی ضروری تھی، معرکہ حق کے بعد پاکستانیوں کو بہت سنجیدگی سے لیا جا رہا ہے۔

جمعہ کو یہاں اہم گفتگو کرتے ہوئے وفاقی وزیر اطلاعات نے کہا کہ وزیراعظم کی زیر صدارت افغان پناہ گزینوں کی واپسی کے حوالے اعلیٰ سطحی اجلاس منعقد ہوا جس میں بروقت اور اہم فیصلے کئے گئے جبکہ سابقہ فیصلوں پر عمل درآمد کا جائزہ بھی لیا گیا۔

(جاری ہے)

وفاقی وزیر نے بتایا کہ اجلاس میں تمام متعلقہ ادارے اور چاروں صوبائی حکومتوں کے نمائندے شریک تھے تاہم وزرائے اعلیٰ میں سے صرف خیبرپختونخوا کے وزیراعلیٰ سہیل آفریدی موجود نہیں تھے، ان کی نمائندگی مزمل اسلم نے کی جنہوں نے تفصیلی گفتگو کی اور اپنا موقف پیش کیا مگر جب صوبے کی سکیورٹی، امن و امان اور لوگوں کے تحفظ کی بات ہو تو ضروری ہے کہ وزیراعلیٰ خود موجود ہوں۔

انہوں نے کہا کہ اجلاس میں دیگر معاملات کے ساتھ ساتھ سکیورٹی فورسز کی قربانیوں پر بھی بات ہوئی۔ اس موقع پر مزمل اسلم کی طرف سے بتایا گیا کہ پولیس شہداء کے لئے معاوضہ بھی دیا جا رہا ہے اور اس پروگرام کو جاری رکھے ہوئے ہیں مگر وزیراعلیٰ خیبر پختونخوا کا اسلام آباد میں موجود ہونے کے باوجود اجلاس میں شرکت نہ کرنا ایک سیاسی سٹنٹ کے سوا کچھ نہیں جس کا نقصان صرف عوام کو ہوتا ہے۔

وفاقی وزیر اطلاعات نے کہا کہ امن و امان کے حوالے سے بریفنگ سے غیر حاضری کی وجہ سے انہیں بیک گرائونڈ کا علم نہیں ہوگا اور انہیں سمجھنے میں وقت لگے گا، امن و مان کے حوالے سے سیاست کھیلنا افسوسناک ہے، وزیراعلیٰ خیبر پختونخوا کو شاید سوشل میڈیا پر داد اور سیاسی پوائنٹ سکورنگ تو ضرور حاصل ہو جائے گی مگر جب صوبے کے عوام یا ملک کے لئے حقیقی فیصلے کرنے کا وقت آئے گا تو یہ ہمیشہ پیچھے رہیں گے کیونکہ یہ اجلاس میں بیٹھ کر بات چیت کرنے پر یقین نہیں رکھتے۔

پی ٹی آئی اور ٹی ایل پی کی احتجاج کی کال کے حوالے سے وفاقی وزیر اطلاعات نے کہا کہ ٹی ایل پی اور پی ٹی آئی کی احتجاج اور ہڑتال کی کال عوام نے یکسر مسترد کر دی ہے، جمعہ کو ملک بھر میں معمولات زندگی معمول کے مطابق رہے، سڑکوں پر رش اور گہما گہمی رہی، بازار اور مارکیٹیں کھلی رہیں جبکہ عوام غزہ اور فلسطین کے معاملہ پر اللہ تعالیٰ کا شکر ادا کر رہے ہیں۔

انہوں نے کہا کہ پاکستان نے فلسطین کے مسئلہ پر ہمیشہ بھرپور اور اصولی موقف اپنایا ہے، پاکستان نے ہر عالمی فورم پر مظلوم فلسطینی عوام کی آواز بلند کی اور اسرائیلی مظالم کی واضح الفاظ میں مذمت کی۔ پاکستان کا یہی موقف رہا ہے کہ ایک آزاد فلسطینی ریاست ہو جس کا دارالحکومت القدس شریف ہو۔ انہوں نے کہا کہ پاکستان کے موقف کو عالمی سطح پر سراہا جا رہا ہے جو ہماری خارجہ پالیسی کی ایک بڑی کامیابی ہے۔

انہوں نے مزید کہا کہ وزیراعظم پاکستان کو عالمی فورمز پر جو عزت و وقار حاصل ہوا، خصوصاً صدر ڈونلڈ ٹرمپ کی جانب سے جو عزت دی گئی، یہ اس بات کا ثبوت ہے کہ پاکستان کی خارجہ پالیسی درست سمت میں جا رہی ہے۔ انہوں نے کہا کہ آج پاکستان اور سبز پاسپورٹ کی عزت میں اضافہ ہوا ہے، معرکہ حق کے بعد پاکستانیوں کو دنیا بھر میں بہت سنجیدگی سے لیا جا رہا ہے، پاکستان کے شہری جہاں بستے ہیں ان کی عزت و تکریم کی جا رہی ہے۔

انہوں نے کہا کہ پی ٹی آئی اور ٹی ایل پی کی جانب سے دی جانے والی احتجاج اور ہڑتال کی کال کو عوام، تاجروں، کاروباری برادری اور چیمبرز نے یکسر رد کر دیا ہے۔ نہ کوئی مظاہرہ ہوا، نہ ہی کاروباری زندگی متاثر ہوا۔ انہوں نے کہا کہ بے مقصد احتجاجی کالوں کا انجام یہی ہوتا ہے کہ عوام انہیں مسترد کر دیتے ہیں کیونکہ عوام ترقی، استحکام اور امن چاہتے ہیں۔