Live Updates

امریکی کانگریس میں پاکستان کے حق میں قرار داد پیش، ایران امریکا جنگ کے خاتمے ،قیامِ امن کی کوششوں کی تعریف

جمعہ 8 مئی 2026 12:59

واشنگٹن (اُردو پوائنٹ اخبارتازہ ترین - اے پی پی۔ 08 مئی2026ء) امریکی ایوانِ نمائندگان میں پیش کی گئی ایک قرارداد میں امریکا اور ایران کے درمیان جنگ کے خاتمے کیلئے پاکستان کی ثالثی کی کوششوں کو سراہاگیاہے۔کشمیرمیڈیاسروس کے مطابق یہ قرارداد ٹیکساس سے ڈیموکریٹ رکن کانگریس ایل گرین نے 119ویں کانگریس کے دوسرے اجلاس کے دوران پیش کی۔قرارداد میں پاکستان کو ایک "اہم غیر جانبدار ثالث" قرار دیتے ہوئے کہا گیا ہے کہ پاکستان نے فریقین کے درمیان رابطے اور مذاکرات کے لیے عملی کردار ادا کیا۔

قرارداد میں کہا گیا ہے کہ پاکستان ایک غیر جانبدار اور قابل اعتماد ثالث ہے جس نے ایسے تباہ کن تنازع کے دوران سفارتی کردار ادا کیا جس کے نتیجے میں بڑے پیمانے پر جانی نقصان، عوام کی بے دخلی اور عالمی برادری پر بھاری مالی بوجھ پڑا۔

(جاری ہے)

رکن کانگریس نے کہا کہ جنگ، جانی نقصان اور شدید انسانی تکالیف کے ماحول میں ان عناصر کو تسلیم کرنا ضروری ہے جو امن کیلئے کام کر رہے ہیں۔

قرارداد میں کہا گیا ہے کہ پاکستان نے ایران اور امریکہ کے درمیان کشیدگی کے خاتمے کے لیے بات چیت کو آگے بڑھانے میں کردار ادا کیا اور مذاکرات کیلئے مختلف سفارتی وفود کی میزبانی بھی کی۔انہوں نے کہا کہ پاکستان کا غیر جانبدار شراکت دار کے طور پر کردار اس بات کی یاد دہانی ہے کہ سفارت کاری اب بھی آگے بڑھنے کا سب سے موثر راستہ ہے۔ ایل گرین نے مزید کہا کہ پاکستان کی سفارتی کوششوں کو سراہ کر ہم تباہی کے بجائے مذاکرات کو ترجیح دینے اور اس تنازع سے متاثر بے گناہ جانوں کے تحفظ کے عزم کا اعادہ کرتے ہیں۔

ایوان نمائندگان میں میں پیش کی گئی اس قرارداد کا مقصد پاکستان کی ان سفارتی کوششوں کو باضابطہ طور پر تسلیم کرنا اور ان کی تعریف کرنا ہے جو خطے میں دیرپا امن کے قیام کے لیے کی جا رہی ہیں۔ پاکستان کی جانب سے امن کی کوششوں پر بھارت کو عالمی سطح پرشدید سبکی کا سامنا کرنا پڑ رہا ہے ۔