گورنر سندھ نے 23ویں آئی ٹی آئی ایف ایشیا 2026 کا باضابطہ افتتاح کر دیا

کراچی (اُردو پوائنٹ اخبارتازہ ترین - اے پی پی۔ 12 مئی2026ء) گورنر سندھ نہال ہاشمی نے کراچی ایکسپو سینٹر میں 23ویں انٹرنیشنل ٹریڈ اینڈ انڈسٹریل فیئر (آئی ٹی آئی ایف ایشیا 2026) کا باضابطہ افتتاح کر دیا۔ بین الاقوامی نمائش 12 سے 14 مئی تک جاری رہے گی ،جس میں پاکستان اور بیرون ملک سے معروف صنعتکاروں، سرمایہ کاروں، ٹیکنالوجی ماہرین اور کاروباری برادری نے شرکت کی۔

ایکسپورٹ پروسیسنگ زونز اتھارٹی (ای پی زیڈ اے) کے چیئرمین فریدون اکرم شیخ نے کہا کہ آئی ٹی آئی ایف ایشیا 2026 کا کامیاب انعقاد اور عالمی کمپنیوں کی بھرپور شرکت پاکستان کی معیشت اور صنعتی شعبے پر بین الاقوامی سرمایہ کاروں کے بڑھتے ہوئے اعتماد کا مظہر ہے۔نمائش میں چین کے بڑے صنعتی ادارے آئی بی آئی گروپ کے اعلیٰ سطحی وفد نے شرکت کی اور پاکستان کے ممتاز اداروں کے ساتھ متعدد مفاہمتی یادداشتوں (ایم او یوز) پر دستخط کیے۔

(جاری ہے)

یہ معاہدے ہنڈائی ڈیلرز ایسوسی ایشن آف پاکستان (ایچ ڈی اے پی)، پاکستان پلاسٹک مینوفیکچررز ایسوسی ایشن (پی پی ایم اے)، پاکستان انجینئرنگ کونسل (پی ای سی)، کراچی چیمبر آف کامرس اینڈ انڈسٹری (کے سی سی آئی) اور فیڈریشن آف پاکستان چیمبرز آف کامرس اینڈ انڈسٹری (ایف پی سی سی آئی) کے ساتھ کیے گئے۔چیئرمین ای پی زیڈ اے نے کہا کہ یہ معاہدے پاکستان اور چین کے درمیان ٹیکنالوجی ٹرانسفر، مشترکہ منصوبوں، صنعتی تعاون اور مارکیٹ میں توسیع کے نئے مواقع پیدا کریں گے۔

انہوں نے کہا کہ آئی ٹی آئی ایف ایشیا صنعتی جدت کے فروغ اور بزنس ٹو بزنس شراکت داری کو مضبوط بنانے میں اہم کردار ادا کر رہا ہے۔انہوں نے کہا کہ ہال نمبر 1 میں قائم ای پی زیڈ اے پویلین اور گلگت بلتستان پویلین سرمایہ کاروں اور شرکا کی خصوصی توجہ کا مرکز بن گئے ہیں جہاں سرمایہ کاری کے مواقع اور علاقائی صنعتی صلاحیتوں کو اجاگر کیا جا رہا ہے۔

چیئرمین ای پی زیڈ اے نے کہا کہ پاکستانی صنعت تیزی سے عالمی معیار کی جدید ٹیکنالوجی کی جانب گامزن ہے۔ انہوں نے کہا کہ نمائش میں انجینئرنگ، توانائی، مشین ٹولز، سولر ٹیکنالوجی، آئل اینڈ گیس، پلاسٹکس، کیمیکلز، معدنیات اور جدید صنعتی مشینری سمیت مختلف شعبوں کی نمائندگی کی جا رہی ہے۔انہوں نے اس بات پر زور دیا کہ پاکستان اور چین کے درمیان صنعتی تعاون نئی بلندیوں کو چھو رہا ہے اور یہ تعاون معاشی ترقی، برآمدات اور ٹیکنالوجی کے فروغ میں اہم کردار ادا کر رہا ہے۔آئی ٹی آئی ایف ایشیا 2026 یو ایف آئی سے منظور شدہ ایک بین الاقوامی نمائش ہے جو صنعتی جدت، سرمایہ کاری کے مواقع اور عالمی کاروباری تعاون کے فروغ کے لیے ایک موثر پلیٹ فارم فراہم کرتی ہے۔