پنجاب حکومت کا نصاب میں حب الوطنی اور معرکہ حق کے مضامین شامل کرنے کا فیصلہ

ڈی جی آئی ایس پی آر سے تعلیمی اداروں کے دورے جاری رکھنے کی درخواست کردی گئی، نجی تعلیمی اداروں کو بھی اپنے ہاں معرکہ حق کے حوالے سے باقاعدہ پروگرامز کا انعقاد یقینی بنانے کی ہدایت

ساجد علی بدھ 13 مئی 2026 14:02

پنجاب حکومت کا نصاب میں حب الوطنی اور معرکہ حق کے مضامین شامل کرنے کا ..

لاہور (اُردو پوائنٹ اخبارتازہ ترین۔ 13 مئی2026ء) پنجاب حکومت نے تعلیمی نصاب اور میڈیا پالیسی میں تبدیلیاں لانے کا فیصلہ کیا ہے اور اب معرکہ حق کے مضامین بھی نصاب میں شامل ہوں گے۔ تفصیلات کے مطابق وزیراطلاعات پنجاب عظمیٰ بخاری کی زیر صدارت انفارمیشن سٹیئرنگ کمیٹی کا ایک اہم اجلاس منعقد ہوا، اجلاس میں سیکریٹری انفارمیشن طاہر رضا ہمدانی، ایڈیشنل سیکرٹری ہوم، ڈپٹی سیکرٹری فنانس اور ڈائریکٹر لا نے شرکت کی۔

بتایا گیا ہے کہ اجلاس میں تعلیمی نصاب میں حب الوطنی اور معرکہ حق سے متعلق خصوصی مضامین شامل کرنے پر اتفاق ہوا، نجی تعلیمی اداروں کو بھی ہدایت کی گئی ہے کہ وہ اپنے ہاں معرکہ حق کے حوالے سے باقاعدہ پروگرامز کا انعقاد یقینی بنائیں، اجلاس میں قومی یکجہتی کے فروغ کے لیے بڑے پیمانے پر عوامی آگہی مہم شروع کرنے کا فیصلہ بھی کیا گیا۔

(جاری ہے)

جلاس میں یہ استدعا بھی کی گئی کہ ڈی جی آئی ایس پی آر تعلیمی اداروں کے دورے جاری رکھیں، قومی یکجہتی اور معرکہ حق پر مبنی فلمیں بنانے کے لیے فلم فنڈز مختص کیے جائیں گے، پاکستان کے پہلے وزیراعظم شہید ملت خان لیاقت علی خان کی زندگی اور خدمات پر ایک خصوصی ڈرامہ بنانے کا فیصلہ بھی کیا گیا، علاوہ ازیں وزیر اطلاعات پنجاب عظمیٰ بخاری نے سوشل میڈیا پر نظر رکھنے کے لیے سخت اقدامات کا اعلان کیا۔

بتایا جارہا ہے کہ محکمہ اطلاعات اور محکمہ داخلہ مل کر ایک خصوصی مانیٹرنگ سیل بنائیں گے، جس کی مدد سے سوشل میڈیا پر نفرت پھیلانے والے عناصر کی فوری نشاندہی کرکے ان کے خلاف سخت قانونی کارروائی کی جائے گی، محرم الحرام کے تناظر میں نفرت انگیز مواد اور اشتعال انگیزی کے خلاف کریک ڈاؤن تیز کرنے کی ہدایت کی گئی ہے تاکہ امن و امان برقرار رہے، یہ خصوصی سیل ناصرف شرپسندوں پر نظر رکھے گا بلکہ عوام تک بروقت اور درست معلومات کی فراہمی بھی یقینی بنائے گا۔