مقبوضہ کشمیر، کشمیریوں کی جائیدادوں کی مسماری ، ضبطی ، جھوٹے مقدمات میں گرفتاری کا سلسلہ جاری

سرینگر(اُردو پوائنٹ اخبارتازہ ترین - این این آئی۔ 14 مئی2026ء) بھارت کے غیر قانونی زیر قبضہ جموںوکشمیر میں بھارتی انتظامیہ کی طرف سے انسداد منشیات کی نام نہاد مہم کی آڑ میں کشمیریوں کے گھرو ں ، دکانوں کی مسماری اور مختلف املاک کی ضبطی کا مذموم سلسلہ بدستور جاری ہے۔ کشمیر میڈیاسروس کے مطابق نئی دلی کے مسلط کردہ لیفٹیننٹ گورنر کے ماتحت انتظامیہ نے آج ضلع کولگام کے علاقے چھانی گام میں ایک کشمیری کی تین دکانیں مسمار کردیں۔

انسداد منشیات کی اس نام نہاد مہم کے تحت اب تک بیسیوں کشمیریوں کے گھراور دیگر جائیدادیں ضبط اور مسمار کی جاچکی ہیں۔ یہ مہم کشمیریوں کو معاشی طور پر کمزور کرنے کی بھارتی سازش کا حصہ ہے۔بھارتی فورسز نے ضلع کولگام سے دو کشمیر ی خواتین کو جھوٹے مقدمے میں گرفتار کر لیا۔

(جاری ہے)

سری نگر کے علاقے شالیمار میں لوگوں نے ایک مقامی نوجوان ارباز علی بٹ کی گرفتاری کے خلاف احتجاج کیا۔

بھارتی پولیس نے ارباز علی کو ایران کے رہبر اعلیٰ آیت اللہ علی خامنہ ای کی شہادت کے خلاف شہر میں میںہونے والے ایک احتجاجی مظاہرے میں حصہ لینے کی پاداش میں گرفتار کیا ہے۔حریت کانفرنس کے سینئر رہنما آغا سید حسن الموسوی الصفوی نے نوجوان کی گرفتاری کی مذمت کرتے ہوئے اسے بنیادی انسانی حقوق کی صریح خلاف ورزی قرار دیا۔ سرینگر ہی کے علاقے راجباغ میں محکمہ پبلک ہیلتھ انجینئرنگ کے ٹھیکیداروں نے چیف انجینئر کمپلیکس میں احتجاجی مظاہرہ کیا اور زیر التواء ادائیگیوں کو فوری طور پر جاری کرنے کا مطالبہ کیا۔

گورنمنٹ میڈیکل کالج بارہمولہ کے غیر جریدہ ملازمین کی اپنے مطالبات کے حق میں غیر معینہ مدت کی ہڑتال چوتھے دن میں داخل ہوگئی ہے ۔ مسول سوسائٹی کے کارکنوں نے سرینگر میں اپنے بیانات میں کہا کہ بی جے پی کی زیرقیادت بھارتی حکومت کشمیریوں کو دبانے اور علاقے میں آبادی کے تناسب کو تبدیل کرنے کے لئے آبادکاری کے اسرائیلی ماڈل پر عمل پیرا ہے۔

انہوں نے کہا کہ بھارت اور اسرائیل کھلے عام بین الاقوامی قوانین اور اقوام متحدہ کی قراردادوں کی خلاف ورزی کر رہے ہیں اور ایک دوسرے کو بھر پور سیاسی اور فوجی تعاون فراہم کر رہے ہیں جس سے کشمیر اور فلسطین میں قبضے اور جبر کے نظام کو تقویت مل رہی ہے۔ انہوں نے کہا کہ ہندوتوا بھارت اور صیہونی اسرائیل کشمیر اور فلسطین میں مسلمانوں کے خلاف جبر، نسل پرستی اور آبادیاتی تبدیلی کی ایک جیسی پالیسیوں پر عمل پیرا ہیں۔

کارکنوں نے کہا کہ بھارت کشمیریوں کی حق خودارادیت کی منصفانہ جدوجہد کو کچلنے کے لیے نگرانی، اجتماعی سزا، بلا جواز نظر بندی، گھروں کو مسمار کرنے اور معاشی گلا گھونٹنے کی اسرائیلی تکنیک استعمال کر رہا ہے۔ ان کا کہنا تھا کہ 5 اگست 2019 کے بعد متعارف کرایا گیا مودی حکومت کا ڈومیسائل قانون اسی آبادکار نوآبادیاتی حکمت عملی کی عکاسی کرتا ہے جو اسرائیل نے مقبوضہ فلسطینی علاقوں میں اپنا رکھی ہے۔

پیپلز ڈیموکریٹک پارٹی کی صدر محبوبہ مفتی نے پاکستان کے ساتھ بات چیت کے لیے اٹھنے والی آوازوں کا خیرمقدم کرتے ہوئے اسے جنوبی ایشیا میں پائیدار امن کو یقینی بنانے کا واحد راستہ قرار دیا۔ اسی طرح نیشنل کانفرنس کے صدر فاروق عبداللہ نے اس بات پر زور دیا کہ ہندوستان اور پاکستان کے درمیان دوستی اور باہمی احترام کشمیر سمیت تمام تنازعات کے حل کے لیے ضروری ہے۔

سوپور میں تحریک حریت کے سینئر رہنما اور ماہر تعلیم ولی محمد شاہ 95 برس کی عمر میں انتقال کر گئے۔وہ شہید سید علی گیلانی کے قریبی ساتھی تھے۔ایک اہم پیش رفت میں، سابق بھارتی آرمی چیف جنرل (ر) منوج ناراوانے نے پاکستان کے ساتھ بات چیت اور عوام سے عوام کے رابطے پر زور دیا ہے۔ ممبئی میں خطاب کرتے ہوئے، نروانے نے کہا کہ دونوں طرف کے لوگ "روٹی، کپڑا اور مکن" کی مشترکہ خواہشات رکھتے ہیں اور ان کے ساتھ دشمنوں جیسا سلوک نہیں کیا جانا چاہیے۔ انہوں نے زور دے کر کہا کہ عوام سے عوام کے مضبوط تعلقات بالآخر ریاستی سطح پر بہتر تعلقات کا باعث بنیں گے۔