پی ایف یوجے کی رانا ثناءاللہ کے صحافیوں کی” تربیت “کے حوالے سے بیان کی مذمت

ایم کیو ایم حقیقی کے چیئرمین آفاق احمد کی جانب سے جلسہ کے دوران صحافیوں کے ساتھ ناروا سلوک پر بھی شدید تحفظات کا اظہار

میاں محمد ندیم اتوار 26 جولائی 2026 16:54

پی ایف یوجے کی رانا ثناءاللہ کے صحافیوں کی” تربیت “کے حوالے سے بیان ..

لاہور(اردوپوائنٹ اخبارتازہ ترین-انٹرنیشنل پریس ایجنسی۔26 جولائی ۔2026 ) فیڈرل یونین آف جرنلسٹس (پی ایف یوجے) نے وزیراعظم کے مشیر برائے سیاسی اموررانا ثناءاللہ کی جانب سے صحافیوں کی تربیت کے حوالے سے نامناسب بیان کی مذمت کرتے ہوئے کہاہے کہ پاکستان میں صحافی نامساعد حالات کے باوجود اپنی ذمہ داریاں احسن طریقے سے نبھا رہے ہیں.

(جاری ہے)

پی ایف یو جے صدر رانا محمد عظیم‘سیکرٹری جنرل شکیل احمد ‘اسسٹنٹ سیکرٹری جنرل اوریونین کے عالمی تعلقات کے کوآرڈنیٹر میاں محمد ندیم‘روالپنڈی اسلام آباد یونین آف جرنلسٹس (آرآئی یوجے) اور پنجاب یونین آف جرنلسٹس(پی یوجے)کے صدور طارق عثمانی اور میاں شاہدندیم نے کہاکہ رانا ثناءاللہ کی جماعت برسراقتدار ہے اگر وہ سمجھتے ہیں کہ صحافیوں کی ”تربیت“ٹھیک نہیں تو وہ ملک بھر میں صحافیوں کے لیے تربیتی ادارے قائم کروادیں پی ایف یوجے ان کا انتظام چلانے کو تیار ہے.

انہوں نے کہاکہ چند یوٹیوبرز کے طرزعمل کی وجہ سے سارے صحافیوں کو الزام دینا وزیراعظم کے مشیر کو زیب نہیں دیتا‘انہوں نے کہا جہاں تک سوال کا تعلق ہے تو صحافی کا کام ہی سوال کرنا ہے جبکہ بطور مشیر اور اعلی حکومت عہدیدار ہونے کی حیثیت سے جواب دینا ان کا فرض ہے اور اگر وہ کسی سوال کا جواب دینا مناسب نہیں سمجھتے تو اس پر معذرت کرسکتے ہیں.

دریں اثناءپاکستان فیڈرل یونین آف جرنلسٹس (پی ایف یو جے) نے ایم کیو ایم حقیقی کے چیئرمین آفاق احمد کی جانب سے جلسہ کے دوران میڈیا کے ساتھ روا رکھے جانے والے سلوک پر شدید تحفظات کا اظہار کیا ہے پی ایف یو جے کے راہنماﺅں نے کہا ہے کہ میڈیا کو دعوت دینے کے بعد اس طرح رویہ روا رکھنا اور تحکمانہ انداز میں کیمرہ مینوں کو کام کرنے سے روکنا ناقابل فہم ہے اگر انہیں میڈیا سے کوئی شکایت تھی تو وہ دعوت دے کر نہ بلاتے مگر مالکان کا غصہ ورکر کیمرہ مینوں پر نکالنا انتہائی نامناسب اور غیر شائستہ ہے.

آفاق احمد نے اپنے خطاب کے وقت وہاں موجود کیمرہ مینوں کو ہٹانے کے لئے سخت رویہ اپنایا اور الزام لگاتے ہوئے کہا کہ اداروں کے مالکان ان کی کوریج نشر کرنے کی بجائے ان کی فوٹیج ایجنسیوں کو دے دیتے ہیں ان کے اس غیر ذمہ دارانہ گفتگو کا کلپ سوشل میڈیا پر وائرل ہے. پی ایف یو جے لیڈر شپ کا کہنا ہے کہ کسی بھی سیاسی جماعت کو میڈیا کو دعوت دینے سے قبل اپنی پالیسی کو مد نظر رکھنا چاہئے مگر میڈیا کو دعوت دینے کے بعد ان سے نامناسب رویہ ناقابل برداشت ہے پی ایف یو جے لیڈر شپ نے مطالبہ کیا ہے کہ اس رویہ پر میڈیا ورکروں سے معذرت کی جائے.