حکومت خود سیاسی ملاقات اور مذکرات کے لیے سنجیدہ نہیں. علامہ راجہ ناصر عباس

حکومت مسائل کے حل کے لیے سنجیدہ سیاسی ڈائیلاگ نہیں کرنا چاہتی . سینیٹ میں قائد حزب اختلاف کی گفتگو

میاں محمد ندیم منگل 4 اگست 2026 15:26

حکومت خود سیاسی ملاقات اور مذکرات کے لیے سنجیدہ نہیں. علامہ راجہ ناصر ..

اسلام آباد(اردوپوائنٹ اخبارتازہ ترین-انٹرنیشنل پریس ایجنسی۔04 اگست ۔2026 ) سینیٹ میں قائدحزب اختلاف علامہ راجہ ناصر عباس جعفری کا کہنا ہے کہ حکومت خود سیاسی ملاقات اور مذکرات کے لیے سنجیدہ نہیں، حکومت مسائل کے حل کے لیے سنجیدہ سیاسی ڈائیلاگ نہیں کرنا چاہتی نجی ٹی وی سے گفتگو کرتے ہوئے انہوں نے کہا ہے کہ اپوزیشن نے ہمیشہ مذاکرات اور سیاسی روابط سے مسائل کے حل کی بات کی، اپوزیشن بامقصد مذاکرات کے لیے تیار ہے حکومت اپنے قدم بڑھائے.

(جاری ہے)

راجہ ناصر عباس کا کہنا ہے کہ محمود اچکزئی نے کہا تھا کہ پارلیمنٹ میں کانسٹیٹیوشن روم میں ملاقات کر لیتے ہیں، اچکزئی نے رانا ثناءکو یہاں تک کہا کہ آپ کی رہائش گاہ پر ملاقات بھی ممکن ہے انہوں نے کہا ہے کہ اربعین پر آیا ہوں، اگر مذاکرات کل بھی ہوں تو آج ہی واپس پاکستان آ جاﺅں گا، اپوزیشن بامقصد مذاکرات کے لیے وزیراعظم اور حکومتی وفد سے ملاقات پر تیار ہے.

دوسری جانب ترجمان تحریک تحفظ آئین پاکستان اخونزادہ حسین یوسفزئی نے گفتگو کرتے ہوئے کہا ہے کہ حکومت مذاکرات میں سنجیدہ ہوتی تو اپوزیشن پر انسداددہشت گری کے پرچے نہ کراتی‘اخونزادہ حسین کا کہنا ہے کہ مذاکرات کے لیے مثبت ماحول ہوتا ہے، بدقسمتی سے حکومت خرابی پیدا کر رہی ہے، بامقصد مذاکرات کرنا ہوتے تو اپوزیشن کے خلاف مقدمات نہ درج کروائے جاتے. انہوں نے کہا ہے کہ حکومت مذاکرات کرنا چاہتی ہے تو اب تک اپوزیشن قیادت کی اڈیالہ جیل میں عمران خان سے ملاقات کرا دیتے، اپوزیشن قائدین کے علاوہ سابق وزیراعظم کی بہنوں تک کو اڈیالہ جیل میں ملاقات نہیں کرنے دی جا رہی.