عالمی برادری جموں وکشمیر میں بھارتی ریاستی دہشت گردی کو روکے ، ایڈوکیٹ عبدالرشید منہاس

اتوار 9 اگست 2026 15:42

سرینگر (اُردو پوائنٹ اخبارتازہ ترین - اے پی پی۔ 09 اگست2026ء) غیرقانونی طورپر بھارت کے زیر تسلط جموں وکشمیر میں کل جماعتی حریت کانفرنس نے امن پسند اور جمہوریت پسند دنیا سے اپیل کی ہے کہ وہ بھارت کی بی جے پی حکومت کواقوام متحدہ کی طرف سے تسلیم شدہ متنازعہ علاقے جموں و کشمیر میں بین الاقوامی قوانین اور اصولوں کی خلاف ورزی سے روکے۔کشمیر میڈیا سروس کے مطابق کل جماعتی حریت کانفرنس کے ترجمان ایڈوکیٹ عبدالرشید منہاس نے سرینگر میں جاری ایک بیان میں کشمیر کاز کے لیے پاکستان کی غیر متزلزل اور بے مثال حمایت کو سراہتے ہوئے اسے بھارت کے غیر قانونی زیر تسلط جموں و کشمیر کے لوگوں کے لیے حوصلہ افزائی کا باعث قرار دیا۔

ترجمان نے آزادی پسند رہنما علی محمد ڈار عرف برہان الدین حجازی کوآج ان کے 28ویں یوم شہادت پر شاندار خراج عقیدت پیش کیا۔

(جاری ہے)

بیان میں کہا گیا کہ علی محمد ڈار ایک پولیس افسر تھے لیکن انہوں نے کشمیر کے بہتر سیاسی مستقبل کے لیے نوکری چھوڑ کر تحریک آزادی میں شمولیت اختیار کی۔ بھارتی فوجیوں نے علی محمد ڈار کو09 اگست 1998 کو سرینگر میں شہید کیا تھا۔

حریت ترجمان نے کشمیریوں کے اس عزم کا اعادہ کیا کہ وہ شیخ عبدالعزیز، علی محمد ڈار اور دیگرشہدا کے مشن کو بھارتی تسلط سے مکمل آزادی تک جاری رکھیں گے۔دریں اثناءکل جماعتی حریت کانفرنس کی آزادکشمیر شاخ نے ایک بیان میں کہاکہ وہ جموں و کشمیر پیپلز لیگ کے شہید رہنما شیخ عبدالعزیز کے 18ویں یوم شہادت کے موقع پراحتجاجی ریلیوں، سیمینارز او ردیگر تقریبات کا انعقاد کرے گی۔ شیخ عبدالعزیز کو بھارتی فورسز نے 11 اگست 2008 کو اس وقت شہید کر دیا تھا جب وہ جموں میں ہندوتوا ہندو انتہا پسندوں کی طرف سے وادی کشمیر کی معاشی ناکہ بندی کے خلاف احتجاج کرتے ہوئے سرینگر سے کنٹرول لائن کی طرف ایک جلوس کی قیادت کر رہے تھے۔