نومئی: فیض حمید اور کچھ شخصیات کو بھی جلد چارج شیٹ کیا جائے گا. راناثنا اللہ

اسلام آباد(اردوپوائنٹ اخبارتازہ ترین-انٹرنیشنل پریس ایجنسی۔27 اگست ۔2026 ) وزیراعظم کے مشیر برائے سیاسی امور رانا ثنااللہ نے کہا ہے کہ وفاقی وزیرداخلہ مسحن نقوی اور چیئرمین تحریک انصاف بیرسٹرگوہر کا رابطہ ہے، یہ اچھا ہے، اس کے ذریعے بات کرنی چاہیے علی امین گنڈاپور کا بھی وزیرداخلہ سے رابطہ تھا ہم نے ہمیشہ اس کو سراہا، سانحہ 9 مئی ریاست اور عسکری ادارے پر حملہ تھا جسے نہ معاف کیا جائے گا اور نہ ہی بھلایا جائے گا، اس معاملے میں سابق آئی ایس آئی چیف فیض حمید اور مزید کچھ شخصیات کو بھی جلد چارج شیٹ کیا جائے گا.

(جاری ہے)

ایک انٹرویو میں رانا ثنااللہ نے کہا کہ ہم ہمیشہ زور دیتے ہیں کہ سیاستدانوں کو ایک ساتھ بیٹھنا چاہیے، میثاق جمہوریت ہواتوپھرتیسرے صاحب آگئے،وہ آج تک سنبھالے نہیں جارہے راناثنااللہ نے کہا کہ عمران خان سے متعلق سپریم کورٹ کا فیصلہ سیاسی بنیاد پر نہیں تھا،سابق وزیراعظم کو شفا ہسپتال ہی لایاجارہاتھا، ایجنسیوں نے کہا شفا ہسپتال لائے توامن وامان کی صورتحال پیدا ہوسکتی ہے، کہاگیاکہ ڈاکٹرز عمران خان کا چیک اپ پمز میں کرلیں.

انہوں نے کہا کہ حکومت نے فیصلے پر جو موقف اختیار کیا وہ بھی درست ہے، قانون میں ہے کسی بھی قیدی کاسرکاری ہسپتال سے باہر علاج نہیں ہوسکتا، وزیراعظم توہین عدالت کے معاملے میں پارٹی نہیں، درخواست میں محسن نقوی کانام نہیں،سیکرٹری داخلہ کانام ہے. راناثنااللہ کا کہنا تھا کہ ڈی جی آئی ایس پی آر نے9مئی سے متعلق کہاتھا یہ ادارے پرحملہ تھا، ڈی جی آئی ایس پی آرنے کہا تھا9مئی حملے کو معاف اوربھلایا نہیں جائے گا، کسی کو اب تک معاف کیاگیاہے نہ معاف کیاجائے گا، 9 مئی کوفوج میں بغاوت کی کوشش کی گئی،یہ بہت بڑا جرم ہے.

ان کا کہنا تھا کہ پمزہسپتال واقعہ افسوسناک اوروالدین کیلئے صدمہ ہے، پمزواقعے کی انکوائری ہونی چاہیے،ملوث افراد کوسزا ملنی چاہیے، وزیراعظم نے واقعے پراعلی سطح اجلاس بلایا،تمام چیزوں کاجائزہ لیا، پمزواقعے میں جو بھی ذمہ دار ہے اس کو مثال بنانا چاہیے، وزیراعظم کا کام تونہیں ہے کہ وہ ہسپتال میں جاکرچیک کریں کس چیزکی ضرورت ہے. ملک کی موجودہ سیاسی صورتحال پر بات کرتے ہوئے مسلم لیگ نون کے رہنما نے کہا کہ ن لیگ اور پیپلزپارٹی کو پچھلے 10 سے 15 سال کی سیاسی جنگ کے بعد احساس ہوا کہ یہ راستہ غلط ہے اور انہوں نے مل کر بیٹھنے کا فیصلہ کیا، تاہم اس کے بعد عمران خان کا آنا ہوا جو آج تک کسی سے سنبھالے نہیں جا رہے.